Доразы ог-огдэ валан но гажан кузёясько

Шуд. Ма со? Та юанлы котькуд адями ас сяменыз валэктон сётэ. Но тросэз понна шуд – со семья. Озьы малпало Алтау гуртысь Фаизовъёс но. Анна но Тимофей Фаизовъёс доры пырем бере ик шӧдӥське, та юртын ог-огдэ валан, гажан кузёясько шуыса.

Кузпалъёс пичиысен тодмо. Соос Алтауын вордӥськемын. Школаын но одӥг классын дышетскиллям. Улон сюрес кузя 27 арлы матэ ӵош вамышто ни. Кузпалъёслэн кык пиоссы – Александр но Евгений. Бадӟымез пизы кузпалъяськемын ни. Со вахта амалэн палэнэ ветлыса ужа. Таня кузпалыз нуныен пуке. Соослэн туэ толшор толэзе пизы вордӥськиз. «Гуртын улӥсьёслэсь ӵем кылӥськом, егитъёс городъёсы кошко, нылпиос ӧжыт вордӥсько шуэмзэс. Гуртын нуны ке вордӥське, со ваньзы понна бадӟым шумпотон луэ. Берлось куинь толэзь куспын Алтауын кык нылпи вордӥськиз. Солы туж шумпотӥськом. Кык пичильтыкъёс пӧлысь одӥгез - милям Тимур внукмы. Тазаесь мед будозы», - вера Анна Фазылхановна. Адямиослэн тазалыксы, гуртоосызлэн тазалыко улонэн эшъяськемзы сое тужгес но сюлмаськытэ. Анна Фаизова фельдшерын тырше угось. Та ужзэ со 24 ар ӵоже быдэсъя ни. Анна Фазылхановнаез гуртаз, бускель гуртъёсын гинэ ӧвӧл, мукет ёросъёсын но ужзэ валась ӧнерчиен тодо, ӵем юрттэт курыса вазисько. «Калтасы ёросысь Бадӟым Качак, Качкин-Турай гуртъёсысь, Янаулысь, Нефтекамскысь но жингырто, висёнъёссы пумысен юаллясько», - верало Анна апайлэн дорысьёсыз.

Кызь ньыль ар ӵоже фельдшерлэн улоназ пӧртэм вакытъёсыз луиллям. Свердловск медучилищеез йылпумъяса бертэм егит ӧнерчи, гуртаз уж луымтэен, нырысь бускель гуртъёсын ужам: аръёс ӵоже Бустанаево, Абдуллино, Ваныш-Алпаутово, Кузбаево гуртъёсы нуись сюресъёсты лёгам. «Уж дурам трос дыръя пыдын, толалтэ – куасэн, ортчись-мынӥсь машинаосын ветлӥсько вал», - вера фельдшер. 2010-тӥ арысен Анна Фазылхановна вордскем гуртаз ужа. «2018-тӥ арын тулыспал толэзе гуртамы выль ФАП усьтӥськиз. Шумпотӥсько, шулдыр, югыт, шуныт, бадӟым юртын висисьёсты пумитасько шуыса. Азьлоез ФАП-мы 1965-тӥ арын ӝутэм юртэ интыяськемын вал. Отын туж кезьыт луылӥз», - вера фельдшер.

Анна Фазылхановналы висисьёс вазь ӵукна но, бер ӝыт но, уйин но вазисько. Со котьку юрттэт кизэ мычыны дась. Гуртоосыз фельдшерлы пумтэм тау кылъёссэс верало. Кивалтэт но солэн ужезлы вылӥ дунъет сётэ. 2008-тӥ арын лякыт но ӟеч сямо фельдшерлэсь ужзэ Башкортостан Республикалэн Данъян грамотаеныз пусйиллям. Та вормон бордын - ӧнерчилэн тыршыса ужамез, семьяезлэн оскымон тыбыр пыкет луэмез.

Тимофей Ислибаевичлэн уж сюресэз гурт удысэн герӟаськемын. Со «Победа» ООО-ын пудо утисьын тырше. Фаизовъёслэн Евгений пизы электриклы дышетскем, али ужаны интыяськымтэ на.

Фаизовъёс одӥг юртын тупаса уло. Котькуд ужзэс кенешыса, валче быдэсъяло. Соос туннэ нуналэн гинэ уг уло, азьпалан ӟеч улонзылы, выль вормонъёссылы оско.

Бурай ёрос.

Читайте нас:

Учредитель: Агентство по печати и средствам массовой информации Республики Башкортостан

Регистрационный номер: Свидетельство ПИ № ТУ02-01536 от 6 июня 2016г. Главный редактор: Нигаматуллина Оля Борисовна

Газета "Ошмес" - общественно-политическая, социальная, культурно-просветительская газета удмуртов Республики Башкортостан.

Телефон

Телефон+7 (34778) 2-11-89, 2-18-71

Электронная почта

[email protected]

Адрес

452830, Республика Башкортостан, Татышлинский район, с. Верхние Татышлы, ул. Ленина, д. 91