Улонлэн чеберез нылпиос бордын

Егитъёс семья кылдыто ке но, нуны вордыны уг дырто. Маин со герӟаськемын?

Кык ар талэсь азьвыл семья кылдытэм тодмоосыным та пумысен вераським. «Пичи нылпиосты туж яратӥсько. Кузпалыным нуны вордон сярысь трос вераськиськом. Азьпалан нылпиосмы одно ик луозы. Но али улон интымы ӧвӧл на. Квартира снимать кариськом. Машинамы кредитэн басьтэмын. Пунэмез тырыса быдтӥм ке, улон инты басьтон сярысь малпаськоно. Квартирамы луиз ке, нылпиосмы но вордӥськозы», - шуэ Настя.

Зэм, тросэз егит семьяос таӵе малпанэн уло. Соин кунмы егитъёслы, нуны вайыны малпасьёслы юрттэт возьматон сярысь сюлмаське. "Демография" нацпроект улсын шаерамы, регионъёсын пӧртэм программаос ужало. Егит семьяослы, трос нылпиен семьяослы коньдон юрттэт возьматӥське. Владимир Путин, кылсярысь, Федерал Собранилы Вазиськоназ пусйиз, анаймурт капиталэз 2026-тӥ арозь азинтоно но солэсь быдӟалазэ будэтоно шуыса.«2020-тӥ арысь 1-тӥ толшорысен нырысетӥ пиналзы вордӥськем анай-атайёс 466 сюрс 616 манет коньдон басьтозы. Нош кыкетӥ пиналзы вордӥськем семьяослы ватсаса 150 сюрс манет сётӥськоз», - вераз Владимир Путин.

Анаймурт капитал пумысен ма малпало меда егитъёс? «Нырысетӥ нунымы вордӥськыку, кузпалылэн анай-атаеныз ӵош улӥськом вал. Пинал вордыны малпанмы вань вал бере, милемлы номыр ӧз люкеты. Азьпалан ваньмыз умой луоз шуыса оским. Кыкетӥ пимы вордӥськиз но, гуртысьтымы корка басьтӥм. Анаймурт капитал юрттэт луиз. Улон инты сярысь малпанмы быдэсмиз. Выль юртамы нылмы вордӥськиз. Семья кылдытыса бадӟым улонэ нырысетӥ вамыш лэсьтӥсьёс понна анаймурт капитал бадӟым юрттэт луэ», - верало Дюртюли ёросысь Эвелина но Сергей Зариповъёс.

Милям анай-атайёс анаймурт капиталтэк но милемлы улон кузьмаллям. Песяйёсмы, ӵужайёсмы но улон секыт шуыса улӥллямтэ. Азьпал улонзылэсь чеберзэ, шулдырзэ нылпиоссы бордысь адӟиллям,лэся. Соос шумпотонъёссэс но пиналъёсынызы герӟаллям.

Фото: https://yandex.ru/images/search?