Вуоно арлы уж план кутӥзы

БР-ысь удмуртъёслэн НКЦ-енызы кивалтӥсьлэн воштӥсез Юрис Саитов 2019-тӥ арлы йылпумъянъёс лэсьтӥз, ужъёсты быдэстонын юрттэт возьматӥсьёслы тау кылъёссэ вераз.
Кенешонын 2020-тӥ арын Янаул ёросын ортчоно ужрадъёслы бадӟым саклык висъяськиз. Кылсярысь, Вуж Варашын «Чеберина», Шудекын «Нылпиослэн гужем олимпи шудонъёссы» республика ужрадъёс ортчозы. «Вӧй келян» йылолэз Никольск гуртын пусъёзы. Со сяна, кӧня ке интыосын гуртъёслэсь нуналъёссэс радъялозы.
Люкаськонэ республикаысь удмуртъёслэн НКЦ-енызы кивалтӥсь Салимьян Гарифуллин но пыриськиз. Со удмурт кылэз утён, азинтон но дышетон сярысь вераськиз. Со сяна, Салимьян Гарифуллинович удмурт кылъя дышетӥсьёсты – З. С. Ибраеваез, И. Г. Минликаеваез, А. А. Фаткуллинаез, А. В. Нурисламоваез – тау карон гожтэтъёсын пусйиз. Нош Шудекысь Роман Хазиповез – НКЦ-лэсь ужрадъёссэ интернет пыр югдытэмез понна.
Марина НИКОЛАЕВА.