Шудекын котырес ӝӧк ортчиз

Янаул ёросын «Трезвое село» ёрос конкурс радъяське. Со улсын гуртъёсын пӧртэм ужрадъёс ортчыло. 21-тӥ шуркынмонэ Шудек гуртын «Я выбираю трезвость» котыре ӝӧк радъяськиз. Ужрадэ Янаул ёросысь удмурт огазеяськонлэн кивалтӥсез Юрис Саитов, Шудек гурт поселенилэн администрациеныз кивалтӥсь Валерий Гарипов, ФАП-ысь фельдшер Эмма Шайдуллина, социальной педагог Инзиля Минликаева пыриськизы. Соос тазалыко улонэн эшъяськон, спортлы саклык висъян сярысь вераськизы.

«Мы за здоровый образ жизни» интеллектуально – развлекательной шудон ортчиз. Отын кык командаос - «Женьшень» но «Лотос» - кужымзэс эскеризы. Соос понна тазалыко улонэн герӟаськем юанъёс, пӧртэм конкурсъёс дасямын вал: «Весёлая эстафета», «Закончи пословицу», «Сила духа» но мукет. Таӵе ужрадъёс бере калык умой ужъёс лэсьтон сярысь малпаськыны кутскоз, тазалыкезлы тросгес саклык висъялоз шуыса оскон кылдэ.