+9 °С
Салкым
Антитеррор
Вань иворъёс
Общество
21 ноябрь 2019, 16:50

Конкурс лушкем быгатонлыкъёссэс усьтӥз

Та нуналъёсы Янаул ёросын «Егит семья-2019» конкурс ортчиз. Туэ со Театрлэн арезлы сӥземын вал. Конкурсэ куать семьяос пыриськизы – Людмила но Алексей Ахметхановъёс, Оксана но Евгений Воронцовъёс, Лиана но Ильшат Сайфуллинъёс, Юлия но Сергей Бикузинъёс, Юлия но Артур Такмаковъёс, Альфия но Сергей Тимиршинъёс.

Ӝыт семьяосын тодматскон бордысен кутскиз. Соос котькудзы «Визитной карточка» конкурсэ аспӧртэм дасяськиллям. Соин учкисьёс ваньзэс кужмо кичабонъёсын келязы. Кыкетӥез конкурс «Я – будущая звезда» нимаськиз. Табере сцена вылын яркыт пиштӥзы пиналъёс. Соослы нылпи садысь эшъёссы юрттӥськизы. Куинетӥез конкурс калык сям-йылолъёслы сӥземын вал. Ахметхановъёс, Тимиршинъёс но Бикузинъёс учкисьёсты яркыт калык костюмъёсынызы паймытӥзы. Озьы соос удмурт калык йылолъёсты возьматӥзы. Нош Такмаковъёс но Сайфуллинъёс бигер но пор калыклэн йылолъёсынызы паймытӥзы. Учкисьёслэн сюлмазы Воронцовъёслэн «Иван Купала» пуконзы но сюрес шедьтӥз.
Вань конкурсъёс йылпумъяськем бере, кыл сётӥськиз жюрилы. Соос куинь семьяосты пӧртэм номинациосъя данъязы. Нош Тимиршинъёслэн семьязылы куинетӥ инты сётэмын. Нырысетӥ но кыкетӥ интыосты Ахметхановъёс но Сайфуллинъёс люкизы.
Людмила но Алексей Ахметхановъёс туннэ Янаулын уло. Нош выжыоссы Барабановкаысь но Норканысь потэмын. «Таӵе конкурсэ нырысьсэ пыриськимы,- вера Людмила Ахметханова. – Отын ми асьмеды пӧртэм ласянь возьматӥмы, лушкем быгатонлыкъёсмес усьтӥмы. Кылсярысь, кузпалы кырӟаны быгатэ вылэм, Степан пимы но солэсь бере уг кыльы. Нош Илья пимылэсь калык азьын кылбур усто лыдӟемзэ тодӥмы. Конкурсын ми «Возь вылын шудонъёс» композициез возьматӥмы. Таиз конкурс пыр потыны семьямылы Барабановкаысь ансамбль бадӟым юрттэт возьматӥз. Со понна ми трос балл басьтӥмы. Нош Янаулысь 15-тӥ номеро нылпи сад, кудаз мон ужасько, «шежере», удмурт сиён-юонъёсын, киужъёсын адӟытон дасяны юрттӥз. Соослы сюлмысь тау карон кылъёсмес вераськом».
Егит семьяосын тодматскон ӝыт ӝог йылпумъяськиз. Нош отчы пыриськисьёслэн чебересь малпанъёссы али ке но сюлэмъёссэс шунто на.
Читайте нас: