"Пичи дырмес война лушказ ке но..."

Кышкыт ож кутскыку, соослы куать арес гинэ вылэм. Зэмзэ ке верано, кузпалъёс пичи дырысенызы ӵошен. Нырысетӥ классэ но ӵошен мынӥллям, бусые ужаны но ӵош поталлям. Фаркинисалэсь но, Фарвазетдинлэсь но атайёссэс тушмон шаерамы урдскем бере ожмаськонэ басьтӥллям. Пичи дырзэ тодаз вайыса, Фаркиниса песяй вера:

- Гуртэ ужась пиосмуртъёс ӧз кыле, вань уж нылкышноослэн, нылпиослэн пельпумъёсазы усиз. Ньылетӥ класс бере колхоз бусые ужаны поттӥзы. Сиён ӧвӧл, пыдкутчан, дӥськут ӧвӧл. Война бырем бере но улон секыт вал. Дас ньыль аресысен колхозын скал кыски, кунян, ыж ути.

Фаркиниса Хатмулловналэн уж сюресэз гурт удысын ортчем. Котькыӵе ужез мед быдэсъялоз, ваньзэ тодыса ужам. Солэн ужез трос тау каронъёсын, грамотаосын пусъемын. Фарвазетдин песятайлэн но соос трос люкаськемын. Со но колхозазы пӧртэм ужъёсты быдэсъям.

- Улонын мар адӟим, ваньзэ вераса но, гожтыса но уд быдты. Трос секытлыкъёс пыр потоно луим, - ватса Фарвазетдин песятай. – Дас вить иськемез пыдын ортчыса, Кушнаренкоысь мешокен, тыбыре ӝутыса, ю кидыс нуллэм дыръёс но луизы.

Быдэ вуыса, Фаркинисаен Фарвазетдин улон сюрессэс герӟаллям. Кисамов кузпалъёс куинь пиослы улон кузьмаллям. Пичи но егит дырзы куректыса ортчем адямиослэн азьпал улонзы шудбурен мед пачылмоз шуид ке но, улон аслэсьтыз каре. Аръёс ортчыса, Кисамов кузпалъёсты кышкыт ож тылгизьы эшшо ӵушка, анай-атайлэн сюлмазы ноку бурмисьтэм яра кылдэ. «Кышкыт адӟон пыриз юртамы. Пичиез Анатолий пимы, армие мыныса, Афганистанын, ожын, бырыны шедиз, - бам вылысьтыз синкылиоссэ ӵушылыса вера арлыдо анай. - Куддыр уг но оскиськы, шаермес утисьёслэн радазы шедьыса, пие цинк гробын бертӥз шуыса».

Али Кисамовъёс Миша пизылэн семьяеныз уло. Саша пизылэн но семьяез вань ни. «Ми – узыр песяй но песятай, - шуэ Фарвазетдин Фахретдинович. – Внукъёсмы но внучкаосмы, правнукъёсмы но правнучкаосмы вань ини. Соос шудоесь мед будозы. Нокинлы но жугиськонэз адӟыны медаз гожты».