«Ньыль толэзь эшъяськыса кузпалъяським»

Кузпалъёс кыксы но Янаулын тыршо. Фанзир Муллагалиевич ветстанциын ужа. «Орловской ветучастокен кивалтӥсько. Отчы дас одӥг гурт пыре, - вера со. – Мыным пичи дырысен ик пудоос котырын берганы кельше вал. Сое тодыса, лэся, азьло ветврачъёс монэ сьӧразы нуыны капка азьын возьмаса сыло вал. Техникаен мон туж уг эшъяськиськы». Пудо эмчилэн верамаз удыссэ юн гажамез но яратэмез шӧдӥське. Со сяна, Фанзир Муллагалиевич куинетӥ арзэ ни гуртазы Инмарлы вазиське. «Азьло гуртамы Карим абзи куриське вал. Табере куриськонзэ со мыным кельтӥз. Гуртамы Бусы вӧсь но Ыштӥяк вӧсь ортчытӥськом. Азьло Бусы вӧсь но, Луд вӧсь но ортчытӥллям. Берло огазеязы но Бусы вӧсь гинэ кельтӥзы», - вера со.

Ольга Сергеевнаен пумиськыны ӧз кылды. Ми вуылыку, солэн уж нуналыз тупаз. Со Янаулысь автовокзалын тырше. Кык нунал ужа но кык нунал шутэтске, пе. Югыт но шулдыр юрт пушкын котькытын Ольга Сергеевналэн ки бервылыз шӧдӥське. Солэн вож будосъёсты яратэмез сярысь укно дуръёсысь но выж вылэ интыям чебересь гулъёс верало. Нош кибашлы луэмзэ возьмато пукон, диван но выж вылъёсы пӧртэм шортъёсын чеберъяса керттэм ужъёсыз. «Нылъёс но милям киужен выро. Анайзы сямен, соос но керттӥськыны ярато, - вера Фанзир Муллагалиевич. – Бадӟымез нылмы, Анна, школаез йылпумъяса, Ижевскысь железнодорожной колледже дышетскыны пыриз. Нош Арина нылмы гуртысьтымы школаын куатетӥ классын тодон-валан люка». Кузпалъёс трос пудо утё, муш вордо. Йӧллэсь дасям сиён-юонъёссэс вузаны но йӧндыро. Муш асьме понна гинэ, пе, вордӥськом.

Ахметгареевъёс ваньмон дырзэс огинын ортчытыны тыршо. «Вордӥськем нуналмес, Выль ар праздникез ӵошен ортчытъяськом. Озьы ик нылпиосын ӵош кыре шутэтскыны потаськом», - вера шудо кузпал но атай.