+20 °С
Салкым
Антитеррор
Вань иворъёс
Общество
1 ноябрь 2019, 13:00

Гуртын почтальонтэк уг луы

Кушнаренко ёросысь Канлыын 179 адями улэ. Гуртазы 69 хозяйство лыдъяське. Соослы газет-журналъёссэс, тыл но газ понна квитанциоссэс дыраз вуттон сярысь Айна Фаршатова сюлмаське.

Со 2016-тӥ арысен почтальонын тырше. «Зэм, берло аръёсы газет, журнал басьтӥсьёслэн лыдзы трослы кулэсмиз. Азьло кадь гожтэт но уг гожъяло ни, но извещениос ӵем вуо. Почта пыр заказ лэсьтӥсьёс но вань», - вера А. Фаршатова.
Почтальонлы ужаз Кушнаренковоысь сельскохозяйственной училищеын бухгалтерлы дышетскыкуз басьтэм тодон-валанэз зол юрттэ. Гуртын улӥсь арлыдоос куддыр квитанциоссэс гожъяны но шугъясько. Соослы Айна Кашбулловна, пе, юрттэт возьматэ. Канлыын вордскыса будэм, татын ик улэм, лякытэн вазиськись кышномуртлэсь лыктэмзэ соос шумпотыса витё. Айна апай юрттэт кизэ но мычоз, шуныт кылзэ но вералоз, кенеш но сётоз. Туннэ улонамы интернет бадӟым инты ке но басьтэ, гуртын почтальонтэк уг луы.
Азьло Айна Кашбулловна бухгалтерын тыршем, Чапаев нимо колхозысь бригадаын пӧртэм ужъёсты быдэсъяно луэм. Дамир кузпалыныз соос куинь нылпи будэтӥллям. Али нылпиоссы асьсэлэн семьяосынызы уло ни.
Гурт урамъёсты нуналлы быдэ сямен пыдын ке но ортчоно, ужез пумысен А. Фаршатова уг ӝожтӥськы. Газет-журналъёссэс кузёоссылы со котьку вакытаз нуэ. Айна Кашбулловна гуртын ортчись ужрадъёсы но пыриське, «Италмас» удмурт фольклор ансамбле ветлэ.
Миляуша БУЛАТОВА.
Читайте нас: