Кырӟась Людмила Ахтариева

Дышетӥсь яке артист

Куинь сузэръёс Лилиана, Людмила, Динара Ахтариеваос, Вараш школаын дышетскыкузы, котькуд ужрадэ мылысь-кыдысь пыриськылӥзы. Куиньназы ик кырӟаны яратылӥзы. Уфаын ортчем одӥгаз конкурсын Люда лауреат но луиз. Мукет ӵошатсконъёсын но вормисьёс пӧлы сюрылӥз. Тӥни соку ик вордӥськиз, дыр, артист луон сярысь малпанэз, но сое шарае ӧз поттылы, пушказ возиз. Артистэ дышетскон гуртын будӥсь нылашлы фантастика кадь потылӥз.

Школаез йылпумъяса, Людмила Ахтариева бускель элькунысь Удмурт кун университетын дышетскыны малпаз. Удмурт кылъя дышетӥсь луэмез потӥз. Атаез но дышетӥсь угось. Нылмуртлы ӧз удалты – конкурс пыр ортчыны баллэз ӧз тырмы. Куашкам мылкыдын со Янаулэ вуиз.

- Озьы тупаз – сюрес вылысен райцентрысь культура юртлэсь кивалтӥсьсэ пумитай. Фамилиез Капкаева вал, нимзэ вунэтӥ ни, – тодаз вае Людмила Менлатшиновна. – Шорам учкыса ик со валаз урод мылкыдме. Эн куректы, пе. Ижевскысь культпросвет училищее мыныны ӵектӥз. Кырӟаны быгатэмме, конкурсъёсы пыриськемме со умой тодэ угось. Озьы берен Ижевске кошки. Училищеын экзаменъёс мыно вылэм ини. Мыным одӥг нуналскын кык предметэн экзамен сётоно луиз. Пӧрмиз, монэ училищее дышетскыны басьтӥзы.

Одӥг пол Людаез ӵош дышетскись эшъёсыз «Италмас» ансамблен ялэм кырӟасьёсты басьтонъя конкурсэ мыныны ӧтизы.

- Мон, дӥсьтӥсьтэм адями, кышкатски. «Лекциосты кельтыса, отчы мыном-а?» – юасько эшъёсылэсь. Конкурс нуналлы быдэ уг луы, шуизы соос. Соглаш кариськи. Конкурсэ трос адямиос лыктӥллям. Эктӥсьёс но ӧтемын вылэм, – вера Людмила Ахтариева.

Куалекъяса выллем сылыкуз, Люда тодмозэ Светлана Смагинаез пумитаз. Со училищеез йылпумъяса, дано ансамбльын ужа ни.

- Сопранаос трос, альтэн кырӟа, Люда, – ӵектӥз Светлана. Ахтариева озьы ик лэсьтӥз. Эктыны быгатэмзэ но эскеризы. Ваньмыз умой пӧрмиз кадь. «Мугорыд тынад пичигес», – шуиз комиссилэн ёзчиосыз пӧлысь одӥгез.

- Мынам но мугоры пичи. Мыным кырӟась пар луоз, – Люда пала дурбасьтӥз Евгений Серебренников. Со но комиссиын вал. Ансабльлэн кивалтӥсез Анатолий Мамонтов егит нылмуртэ коллективазы кутыны соглаш кариськиз.

- Кӧня ке улыса, Анатолий Васильевич монэ ужаны ӧтиз. Японие, Ленинградэ мыныны дасяськиськом, пе, артистъёсмы уг тырмо. Нош госэкзаменъёс дорозь ог куинь толэзь гинэ кылемын на. Кызьы мон дышетсконме куштыса кошком? Соку ансамбле мыныны соглаш ӧй кариськы. Анатолий Васильевичлэн вожез ик потӥз кадь, художественной самодеятельностьын ужалод ни шуэмез сюлэмме ик вӧсь кариз. Диплом басьтон азям сюлэмшугъяськыны кутски: ансамбле ӧтёзы на меда? Нош ӧтён ялан уг вуы. Возьмаськыку дыр но каллен ортче. Озьы ке но ӧтён лэзизы, – ортчем аръёсты тодаз вайыса вера Людмила Менлатшиновна.

Куамын ар – кырӟан сюрестӥ

Кырӟан сюрес. Вань-а со? Людмила Ахтариева понна со вань. Кырӟан сюрес ас бордаз кыске, азьлань нуэ, малпаськытэ, сюлэмшугъяськытэ, куддыр бӧрдытэ. Куамын арскын кӧня кырӟанъёс кырӟамын! Людмила Менлатшиновна сое ачиз но уг тоды. Огназ кырӟамъёссэ гинэ лыдъяно ке, куамынлэсь трос люкаське ни, пе.

- Кырӟаны яратонэд мар, кин бордысь потӥз меда? – юасько Людмилалэсь.

- Нырысь ик анкай бордысь, дыр. Со котьку кырӟалляз: ужын но, дорын но. Куараез чебер. Кырӟамезлы синмаськылӥзы. Ачиз со Татышлы ёросысь Вязовка гуртысь, – вераз Л. Ахтариева.

- Со кырӟась гуртысь ук!

- Озьы.

Зэмзэ но, Вязовка гуртысь трос тодмо кырӟасьёс потӥзы ни: Алёна Тимерханова, Андрей Камалтдинов, Лилиана Нуриахметова, Альфира Камалтдинова но мукетъёсыз.

- Мынам аткае но кырӟаны яратылӥз. Арганэн но со умой шудэ вал, – ватсаз на калык артистка.

- Концерт возьматыкуды сомында кырӟанъёс быдэстӥськоды. Кылъёсыз уг вуно-а?

- Ой, олокыӵе но учыръёс луыло. Кырӟаку куддыр кыӵе ке кыл йырысь потэ. Сыӵе дыръя токен шуккем кадь луиськод. Вунэм кыл интые мукетсэ пуктыны валаськод ке, со умой ни. Сюлмаськиськод, азьпал куплетъёсын «могӟетъёс» медаз сюре шуыса, – маде кырӟась.

Одӥг пол Воткинскын концерт возьматыкузы, Л. Ахтариева сцена вылысь бызьыса сямен потӥз но выль костюмзэ дӥсяны кутскиз. Киыныз рубильнике йӧтскемзэ валаса ик ӧз вутты. Сцена интыысьтыз вырӟиз, берганы ӧдъяз. Отын кырӟасьёс шуэрскизы, марзэ-созэ уг валало, йырзы поромиз кожало.

Людмила Ахтариевалы вунонтэм кылиз США-е ветлэмзы. Со сярысь ачиз тазьы мадиз:

- 1993-тӥ арлэн пумаз Америкае лобӟим. Выль 1994-тӥ арез самолётын пумитамы. США-ын кык арня ӵоже улӥм. Асьме дорын со вакытэ магазин ӝажыос бушесь вал. Супермаркетэ пыримы но, ыммес усьтыса, кема сылӥмы: сомында вузъёсты адӟеммы ӧй вал на. Адямиос но отын пӧртэмгес потӥзы: пальпотӥсесь, юрттыны дасесь. Сюрес вамен потыны шугъяськыса сылыкуд, дорад лыктозы но валэктозы… Фестивале ветлӥм куэм удмурт дэремъёсын, чигвесьёсын. Асьме дорын толалтэ вал ни, нош отын сыӵе пӧсь. Сцена вылын мон вылькенэз шудӥ бере, йырам айшон понэмын. Суть-суть котмиськиз. Дӥселы синмаськыса, япон кышномурт весяк сьӧрам ветлӥз, олокызьы но фотое пуктылӥз. Супермаркетэ но мынам тусбуеным туж бадӟым фотосуред ошемын вал.

- Сцена вылысен туж капчиен кырӟаськод шуыса адӟиське. Озьы-а со? – интервью басьтыкуз Людмилалы таӵе юанэн куке но вазиськиз вал кылбурчи Галина Романова. Л. Ахтариева соку таӵе валэктон сётӥз:

- Сцена вылэ выль кырӟанэн нырысьсэ потыкум, котьку туж шугъяськисько: кызьы сое учкисьлы возьматыны быгато, кызьы пумиталозы? Котькудӥз бордын сюлэмдэ поныса ужаськод ук, куара вӧзы одно ик мылкыдэз сётоно. Нош кырӟан куарая тупа ке, адямиослэсь шорад пальпотыса учкемзэс адӟиськод ке, крезьгур кисьтӥськыса кадь кошке. Кырӟанэз макем трос пол быдэстӥськод, сокем трос пол со бордын ужаськод.

Людмила Менлатшиновналэн малпанэз ӧз воштӥськы, со котьку кырӟанъёс пушкын улэ.

Юанъёс – валэктонъёс

- Кыӵе ке крезьгуро инструментэн шудӥськод-а?

- Училищеын баянэн шудыны дышетӥзы вал. Училище бере баянэз киям ӧй кутылы ни. Али жалясько. Шудыны быгатэме чик ӧй люкетысал.

- Аслад кырӟан гожтэмед ӧвӧл-а?

- Ӧвӧл. Малы ке уг дӥсьтӥськы сыӵе уж борды кутскыны.

- «Ошмес» газетлэн редакцияз ужасьёслэн семьяды сярысь тодэмзы потэ.

- Мон Салават Абдуллинлы бызи. Ог-огмес яратӥм. Со эктӥсь. Укмыс ар улӥм. Рустам пимы вордӥськиз. Собере люкиським. Пичи дыръяз пиме гастрольёсы сьӧрам басьтылӥ. Одӥг пол Вятские Поляные мынӥськом вал. Рустамлэн мугорыз ӟырдаз, висьыны кутскиз. Анатолий Васильевич милемыз гуртамы бертыны лэзиз. Ӧз тышкаськы. Кивалтӥсьмы милемыз валаны тыршиз. Солы котьку тау карисько, ӟеч кылъёсын гинэ тодам ваисько. Со мынам улонам бадӟым дышетӥсе вал. Пие али Москваын гуманитарной кун университетын дышетске. Пичи дыръяз актёр луыны малпа вал, бӧрысь малпанэз воштӥськиз. Атаез милемыз уг вунэты, юрттӥське, отпуск дыръям вордӥськем гуртам но нуыса кельтэ, берен но вае. Салават сярысь номыр уродзэ вераме уг поты.

- «Ошмес» газетлэн эшшо одӥг юанэз вань на. Анаед али гуртын огназ улэ. Ас дорад сое ваемед уг поты-а?

- Ой, сое интыысьтыз уд вырӟыты. Пие пичигес дыръя анкай ми доры куное трос пол вуылӥз. «Та городады кызьы тӥ улӥськоды?» – паймемзэ вератэк уг кельты вал. Лилиана дыдые но ас дораз Кальтяевое сое улыны ӧте. Уг мыны. Кӧня быгатӥсько, ас коркам уло, шуэ.

- Яратоно сиёнэд.

- Мыным ваньмыз кельше. Гуртэ бертыкум ӟазег сӥль сиыны яратӥсько.

- Кыӵе книгаосты лыдӟиськод?

- Ой, ку меда берлозэ киям книга кутӥ? Михаил Петровлэсь «Вуж Мултан» романзэ туэ лыдӟи. Мон сое куинь пол лыдӟи ни.

- Туэ тынад ӝыны дауръем юбилеед, ансамбльын кырӟамедлы куамын ар тырмиз. Таин валче кыӵе ке ужрад чакламын-а?

- 29-тӥ шуркынмонэ Ижевскысь «Аксион» культура дворецын бадӟым концерт лэсьтыны малпам. Солы дасяськиськом ни. Отын «Италмас» ансамбль сяна, мукет тодмо кырӟасьёс но луозы.

- «Ошмес» газетэз лыдӟисьёслы мар сӥзьысалыд?

- Ваньзылы ик тазалык, шуд, татулык сӥзисько.

Ульфат БАДРЕТДИНОВ.

Ижевск.