Огкылысь уло, нылпиоссылэн вормонъёссылы шумпото

Татын ортчиз соослэн вунонтэм пинал дырзы. Вордӥськем гуртазы ик ог-огзэс шедьтӥзы но улонзэс ӵошен азинтӥзы. Со дырысен 52 ар ортчиз ни.

- Бадӟым Гондыре участковойлы юнматӥзы. Соин сэрен улыны татчы выжим. Со 1977-тӥ арысь сизьыметӥ южтолэзе вал. Милемлы вуж корка сётӥзы. Собере асьмеос выль юрт ӝутыса потӥм, - вера Виталий Шарибзянович.

Солэсь азьвыл со Кипчакысь клубен кивалтэм, милициын ужам. Удысаз рос-прос тыршемзэ лыдэ басьтыса, луоз, дас арлэсь кема участковойын тыршем Виталий Шарибзяновичлы следовательлэсь ужзэ оскиллям. Татын но со ассэ ӟеч ужасен возьматэм. «47 аресысен пенсие потӥ. Куать толэзь шутэтскеме бере, выльысь ужаны ӧтизы. Озьы нош ик куинь арлэсь трос дознавательын тырши, - вера Виталий Шарибзянович. – Армие мон 24 арескам гинэ мынӥ. Вакытаз мыныны тазалыкед уг яра шуизы. «Плесецк» космодромын служить кари. Соку со засекреченной военной объектэн лыдъяськиз. Ракетаослэсь кызьы лобӟылэмзэс адӟи».

Виталий Шарибзяновичлы кузпалэн но удалтэм. Кызьы пусйимы ни, Раида апаен соос ог-огзэс валаса ӝыны даурлэсь кема уло. Раида апайлэн уж сюресэз пудоос котырын ортчем. Кипчакын скал кыскисьын тыршем. Бадӟым Гондыр гуртэ выжем беразы но со удысэзлэсь люкиськымтэ. Скал кыскем, кунянъёсты будэтонын но ужаны вутскем. «Горд кужым» хозяйствоын азьветлӥсьёслэн радазы ветлэм. «Ми ужакумы хозяйствомы кужмо, фермаосмы айбатэсь вал», - ужан аръёссэ тодаз вайыса вера Раида апай.

Адӟем карымон Сакриев кузпалъёс вить нылпиослы улон кузьмазы. Соослы котькудзылы тодон-валан сётон сярысь сюлмаськизы. «Нылпиос визьмоесь, быгатӥсесь луизы, ӟеч дышетскизы, - вера Раида апай. – Бадӟым нылмылэн, Иринамылэн, гинэ улонэз вазь уриз. Секыт висён сое югыт дуннеен люкиз. Кыкетӥез нылмы, Оксана, Чебоксарыын улэ. Надямы гуртамы ик интыяськиз. Алямы Перме бызиз, отын ик улэ. Али Сергей пимылэн семьяеныз ӵош улӥськом». Сакриевъёслэн нылпиосынызы тату улэмзы ог-огзылы вазиськемысьтызы, лякыт учкемысьтызы ик шӧдӥське.

Кузпалъёслэн Нина кензы но Сергей пизы Куедаысь сӥль комбинатлэн Кипчак гуртысь фермаяз тыршо. Пудо эмъясьлы дышетскем Нина Витальевналы сяськаос, гулъёс будэтыны, пе, кельше. «Суредаськыны но яратӥсько. Вакыт гинэ уг шедьы, - вера со. – Со сяна, сценкаосын шудыны яратӥсько». Нош Сергей Витальевич ваньмон дыръяз чорыганы ветлэ. Солы тужгес тол чорыган, пе, сюлмызъя. «Ми пӧзьтӥськонэн ветлӥськом, - вераськонамы пыриське Виталий агай. – Милям асьмелэн чорыган «бригадамы» вань». Сергей Витальевич егит дыръяз валэн ӵошатсконъёсы но пыриськылӥз, нош али со сваркаен выре. Капка, мунчо гуръёс но мукет арбериос тупатъя. Вазё ке, гуртоосызлы но юрттэ. Куинь нылъёслэн атайзы ноку пумит уг луы. Бен, кузпалъёслэн куинь нылъёссы-чеберайёссы. Бадӟымез нылзы Ксения Куедаын роддомын витетӥ арзэ ни акушеркаын тырше. «Пичи дыръя пинь эмъясь луэме потэ вал. Школаын дышетскыкум ик медицина сяна, мукет уж удысэз син азям ӧй пукты», - вера Ксюша. Лякыт но мусо пальышась нылашез ӵемысь «Тюрагай» фольклор ансамбльысь но пумитаны луэ. Кырӟан-эктонэн со пичи дырысеныз ик эшъяськем. Нош башкир музъем вылын Ксюшаез удмурт пиналъёс вожатоен но эмчиен тодо. Со 2013-тӥ арысен ни «Усточикар» лагерьын тырше.

Сакриев кузпалъёслэн шоретӥез Анюта нылзы, семья кылдытыса, Перме улыны интыяськиз. Нош пичиез, Александразы, куинетӥ классын дышетске. Ньыльёслы но витьёслы гинэ дышетскись нылаш небыт шудонъёс вурылэ, гимнастикаен но выре. Со понна Саша арняяз кык пол Куеда ветлэ. Нылаш, анаез сямен ик, суредаськыны яратэ на. Суредаськись, пе, луэме потэ. Собере пичи нылаш коробка поттӥз. «Анаеным мотылёкъёсты люкаськом», - мимлемлы возьматыса вераз со.

Раида но Виталий Сакриевъёс нылпиоссылэн, нунокъёссылэн вормонъёссылы, быгатонлыкъёссылы шумпотыса уло, визь-кенешъёсынызы но юртто.

Марина НИКОЛАЕВА.

Пермь шаерысь Куеда ёрос.