Цифрае выжон азинске

Вылысь Татышлыын улӥсь 66 аресъем Фания Валиуллина, цифровой телевидение выжонэн шугъяськыса, Татышлы ёрос администрациысь информационно-аналитической ёзэтэ жингыртэм, юрттэт курем. Волонтёръёс Фания Миншараповналы кытысь кыӵе антенна басьтыны валэктӥллям но асьсэос, дораз лыктыса, 5-10 минутскын «цифра» пыртӥллям. «Та дырозь передачаосты кабельной телевидение пыр учкисько вал. Со понна толэзьлы быдэ дун тыроно. Мон пенсиын ини, огнам улӥсько. Пенсие бадӟым ӧвӧл. Цифровой телевидение выжыны юрттэмзы понна волонтёръёслы бадӟым тау», - шуэ Фания Валиуллина.

Информационно-аналитической ёзэтысь валтӥсь ӧнерчилэн Рустам Фархутдиновлэн кылъёсызъя, Татышлы ёросын цифровой телевидение выжон амалъёсты валэктон ужъёс азьпаласен быдэстӥськиллям, соин трос шуг-секытъёс кылдӥллямтэ.

- Цифрае выжон юанъёсъя ёросамы «пӧсь линия» ужа. Берло куинь арня куспын кызьлэсь трос адями юрттэт курыса вазиськиз, - вера Р. Фархутдинов. – Волонтёръёс ваньзылы юрттыны дась. Телефон пыр валэктонъёс сёто, доразы мыныса юртто.