"Кыӵе умой шуныт коркан..."

Туэ куарусён толэзе Галихан агаен Муслима апай 51 ар ӵош улэмзэс пусйизы. Та дыр ӵоже кӧня туриж нянь ӵош сиемын, кӧня ошмес ву юэмын. «Ог-огдэ кылон но валан – семья куспын ӟеч улонлэн секретэз», - шуо мӧйыосыз Байдуллинъёс. Кузпалъёс одӥг гуртысь ке но, Галихан агай аслэсьтыз ньыль ареслы пичи егит нылэз армиысь бертэм бераз гинэ синйылтэм. Сабырлы, атаезлэсь нимзэ нуллӥсь егит пи Муслималы но кельшем.

Кузпалъёс тодон-валан басьтыны быгатӥллямтэ, вакытэз сыӵе вылэм. Муслима апай ньыль классэз быдтэм, Галихан агай - сӥзьым классэз. Муслима апайлы гуртазы Радина нимын но вазисько. Малы кышномуртлэн кык нимыз шуоды? Пичи дыръяз юн бӧрдэмысьтыз, оло нимыз уг кельшы-а шуыса, арлыдоос Муслималы Радина ним понӥллям.

Муслима апайлэн уж сюресэз гурт удысын ортчем. Кызь ар «Большевик» колхозын парсь утем, собере бригадаын рядовой луыса ветлэм: кушман будэтэм, фураж ворттэм. Пенсие потон азяз клубын техничка луыса ужам. Соку ик, вылды, «Зангари» удмурт калык ансамбле ветлыны кутскем. Али но уг пумитъяськы, кырӟаны-эктыны ӧтё ке. Ансамблья эшъёсыныз, пе, пумиськемез потэ. Галихан Гильмуллович – ужысь ветеран. Со нефтяникын тыршем: скважинаосты тупатъясь оператор луыса ветлэм. Солэн 30 ар ужамез куинетӥ степенё Трудовой Славая орденэн дунъямын. «Нош мынам орденэ – со куинь нылпиосы», - вераськон куспамы пыриськыса шуэ Муслима Галихановна. Бен, нылпи утён ӵем дыръя анаймурт вылэ усе. Муслима апай котькуд нылпиез сярысь данъяськыса вера. Со кенъёсыныз но туж тупаса улэ. Асьсэос выллем, Байдуллин кузпалъёслэн нылпиоссы но пичи дырысен ужлы дышетскыса будӥзы. Бадӟым пизы Дамир гуртазы ик яна потэмын, Августина кузпалыныз куинь нылпи будэто. Дамир – атаезлэн кивоштӥсез, нефтяникъёс дорын сварщик луыса ужа. Ильсур пизы но Зинаида кензы «Победа» ООО-ын тыршо. Соослэн но куинь нылпиоссы. Пичиез Никита пизы гинэ бордазы на, со 9-тӥ классын дышетске. Муслима но Галихан Байдуллинъёслэн Язиля нылзы Нефтекамскын улэ, Уйпалан пӧзьтӥськись луыса ужа.

Андреевкаысь Байдуллинъёс - адӟем карымон семья. «Ӵош улӥськом, ваньзэ ӵош ужаськом. Анаймылэсь но атаймылэсь нырысь ик визь-кенеш юаськом. Коркамес но пиосмуртъёс асьсэос ӝутӥзы, гур но атаен Ильсур поттӥзы», - шуэ Зинаида. Гуртэк та гуртын нокызьы уг луы. Чагыр эстӥськон Андреевкае вуэмын ӧвӧл на. Гур луэмысь, лэся, коркалэн шунытэз мукет. Гурын пыжиськем но умой пӧрме. Милемыз но Байдуллинъёс соку гинэ гурысь потэм кутэм няненызы утялтӥзы.

Бурай ёросысь кылбурчилэн Рафит Миннекузинлэн «Кыӵе умой шуныт коркан...» кылбурез вань. Андреевкаысь Байдуллинъёслэн но корказы котьку шуныт мед улоз.