+13 °С
Салкым
Антитеррор
Вань иворъёс
Общество
3 Октябрь 2019, 13:47

Пиналъёслы сӥзем уж сюрес

Гуртамы данъяськымон, мукетъёслы адӟем карымон адямиос трос. Дано дышетӥсьёс но ӧжыт ӧвӧл. Гуртысь дышетӥсь Елена Ильтимировна Файзуллина Башкортостанысь Семьяя, ужъя но калыкез улонын утёнъя министерствоен радъям «Трудовая летопись» республика конкурсэ пыриськыса, дышетӥсьёслэсь династизэс – Минликаевъёслэсь (Шайслам Минликаев, Ильтимир Минликаев, Елизавета Минликаева, Ралина Гареева, Григорий Багаутдинов, Елена Файзуллина, Елена Килина, Лариса Ямкаева) уж сюрессэс – возьматӥз. Солэн ужез «Трудовые династии Республики Башкортостан» книгае пыртэмын.

Елена Ильтимировна анай-атаезлэсь, песятаезлэсь, матысьёсызлэсь Ралина Гареевалэсь но Григорий Багаутдиновлэсь адӟем карыса, дыр, дышетӥсьлэсь ужзэ быръем . Атаез Ильтимир Галимович Минликаев Вуж Вараш гуртын будэмын, нош анаез Елизавета Афанасьевна – пичи пурга музъемын. Соос Можгаысь педучилищеын дышетскыкузы тодматскиллям. Диплом басьтыса, семья кылдыто. Минликаев кузпалъёс Вуж Варашын кема уг уло, Шудеке выжо. Татысь школаын ужаны кутско. Елизавета Афанасьевна математикая урокъёсты нуиз, трос аръёс ӵоже директорлэн воштӥсез луыса ужаз. Со – БР-ысь сӥё-дано дышетӥсь. Ильтимир Галимович Шудек сельсоветэн кивалтӥз. Жаляса верано, улонысь туж вазь кошкиз.
Елена пичиысен синмаськыса учкылэм, лэся, дышетӥсьлэн ужез шоры. Адӟем но валам, кызьы дышетӥсь котькуд пинал понна сюлмаське, визьмо, таза мед будозы, умой мед дышетскозы шуыса. Школаез йылпумъяса, Елена УдГУ-ысь филология факультетын дышетскиз. Туннэ нуналэ Янаулысь лицейын ужа, ӟуч кылъя но литературая урокъёсты нуэ. Ужзэ туж яратэ. Солэн дышетскисьёсыз ӵемысь ёрос но республика олимпиадаосы пырисько, вормонъёс басьтыло.
Вераме потэ на Елена Ильтимировналэн апаез Ралина Гареева сярысь. Ралина Михайловна Вуж Варашын вордскыса будэм, УдГУ-ысь филология факультетын дышетскем. Со Шудек школаын удмурт кылъя но литературая, ӟуч кылъя но литературая урокъёсты нуиз. Урокъёсыз тунсыко, мур пуштросо ортчо вал. Ралина Михайловналэн тыршеменыз, нылпиос удмурт кырӟанъёсты, вашкала улон-вылонэз тодэ вайыса, спектакльёс дасяллязы. Солэн дышетскисьёсыз ёрос но республика олимпиадаосысь котьку вормонъёсын берто вал. Ралина Михайловналы «БР-ысь дышетон удысысь отличник» ним сётэмын. Туннэ солэсь ужзэ нылыз Лариса Ямкаева азинтэ, шуыны луоз. Лариса Юрьевна – Шудек школаысь ӟуч кылъя но литературая дышетӥсь.
Елена Ильтимировналэн агаезлэн Григорий Муллаянович Багаутдиновлэн но уж аръёсыз школаын ортчизы. Со ёросысьтымы Орловка школаын дышетӥз, нырысь географияя урокъёсты нуиз, кема аръёс ӵоже военрук луыса ужаз, завучлэсь ужзэ быдэсъяз. Пенсие потон азяз солы директорлэсь ужзэ оскизы. Григорий Муллаяновичлэн тыршемез уно тау карон гожтэтъёсын но Данъян грамотаосын пусъемын.
Дышетӥсьлэн нуналыз матэктэ. Вань дышетӥсьёсты ӟечкыламе потэ та праздникен, соослы юн-юн тазалык сӥзисько, ӵуказе нуналлы осконзы юн мед луоз. Дышетскисьёссы визьмоесь, улонэз яратӥсь мед луозы,
Мария АЛЕКСАНДРОВА.
Янаул ёросысь Шудек гурт.
Читайте нас: