Задор мылкыдын уло, вормонъёссылы шумпото

Пермь шаерысь Куеда ёросысь Бадӟым Гондыр гуртын ветеранъёслэн огазеяськонзы вань. Со кемалась кылдэмын ке но ни, берло аръёссэ туж мыло-кыдо ужа. Огазеяськонэн ньылетӥ арзэ гуртысьтызы школаен 24 ар кивалтэм Зинаида Останина кивалтэ.

Зинаида Ивановналы та ужзэ рос-прос нуыны огазеяськонлэн ёзчиосыз Михаил Менгалиев, Мингали Яманаев, Раиса Гадиятова, Аннасия Зарипзянова, Константин Гараев, Раис Гарайшин, Радислав Фархутдинов но Нурихан Менгаязов юртто. Соослэн котькудзылэн быдэстоно ужзы вань. Кылсярысь, тямыстон одӥг аресъем Михаил Кондратьевич спорт, тазалыко улон понна кыл кутэ. Со ик трос дыръя та ӧрен герӟаськем ужпумъёсты радъя, ужрадъёс ортчытыны юрттэ. Солы юрттӥське Мингали Нургалиевич. Раиса Дмитриевна секретарьлэсь ужзэ быдэсъя, Аннасия Нигаметзяновналы лулчеберет удысысь ужпумъёсты сэрттыны-пертчыны оскемын. Йылолъёсты ортчытонын но ветеранъёслэн огазеяськонзы палэнэ уг кыльы. Константин Нафетдинович, Раис Викторович вӧсьёсты радъяны, сое ортчытыны трос кужымзэс поно. Нош Радислав Михайлович но Нурихан Нурлыевич гуртысь арлыдоослы юрт котырысьтызы ужъёссэс быдэсъяны, улоназы пумиськись шуг-секытъёсты палэнтыны тыршо. Огъя вераса, огазеяськон шуге-леке вуэм мӧйыосты кайгуэнызы ноку огинэ уг кельты. Висьыны усьыкузы эмъюртэ интыяны юрттэ, тазалыксэс эскерыса улэ. «Школаын дышетскисьёслэн волонтёрской отрядзы но арлыдоослы юрттэ. Соос лымы сузяло, пу пыртыло, юрт котырзэс утялто», - вера Зинаида Ивановна.

- Ужаны план ёросысь Ветеранъёслэн кенешсы сётэ. Ми сое лыдэ басьтыса, асьмелы план кутӥськом, - вера огазеяськонэн кивалтӥсь З. Останина. – Пӧртэм ужрадъёсы пыриськиськом. Кылсярысь, арлы быдэ сямен ёрос турслётын кужыммес эскериськом. Волейболъя, капчи атлетикая, куасэн бызьылонъя ӵошатсконъёсы пыриськиськом. Михаил Кондратьевичмы, арлыдыз шоры учкытэк, куасэн, пыдын бызьылыса, котьку вормисе потэ. Мукет воргоронъёсмы нош шашкиен, шахматэн шудонъя ӵошатсконъёсы пырисько. Нылкышноосмылэн волейболъя командазы но кужмо. Со сяна, ми война вакытэ будэмъёсты, ож мышкын тыршемъёсты ноку ум вунэтӥське. Укмысэтӥ куартолэзе, Буре ваён но кайгуо нуналэ, Арлыдоослэн нуналазы ужрадъёсы вазиськом, быгатэммыя юрттыны тыршиськом.

Огазеяськонысь ёзчиос мукет арлыдоосты но ужрадъёсы кыскон сярысь сюлмасько. Пенсие потэмзы бере доразы мӧзмыса медаз пуке, асьсэды пайдаё ужъёс лэсьтыны быгатӥсьтэмен медаз лыдъялэ, пе. Со сяна, арлыдоосты «Шуныт корка» но бордаз люка. Отын киужен вырыны, шутэтскыны, сюлмысь ог-огеныд вераськыны луэ. Пусйытэк кельтыны уг луы арлыдоослэн коллективъёссы сярысь но. Бадӟым Гондырын «Купанча» но «Радость» ансамбльёс ужало. Нырысетӥеныз дас куинетӥ арзэ ни Зинаида Останина кивалтэ. Нош сое кылдытон сярысь Анастасия Гавриловна Менгалиева сюлмаськем. Вуоно арын укмысэтӥ куартолэзе ансамбльлы 15 ар тырмоз. «Адями пенсие потэ, ми сое ансамблямы вазиськом», - вера Зинаида Ивановна. Нош «Радость» ансамблен Нина Нуриева кивалтэ. Коллектив сизьыметӥ арзэ ужа ни. Ансамбльёстэк гуртысь огез ужрад но уг ортчы. Со сяна, соосты палэнын ортчись ужрадъёсысь но пумитаны луэ. Кылсярысь, купанчаос творческой коллективъёслэн «Патриоты края - патриоты России» шаер фестивалязы кык пол вуылӥзы ни. 2009-тӥ арын соос куинетӥ интыен бертӥзы. Нош кылем арын та фестивальын ёросазы нырысетӥ луизы. «Канва» калыккуспо фестивале но купанчаос огпол гинэ ӧз пыриське ни. Купанчаослэн лулчеберет удысын утэм вормонъёссы лыдъянтэм. Спорт ужрадъёсын басьтэм грамотаоссы, дипломъёссы но трос. Озьыен, оскон кылдэ, огазеяськон азьпалан но таӵе ик задор мылкыдын тыршоз но вормонъёсыныз шумпоттоз шуыса.

Марина НИКОЛАЕВА.

Пермь шаерысь Куеда ёрос.