+18 °С
Салкым
Антитеррор
Вань иворъёс
Общество
25 Куарусён 2019, 21:02

Атай юрт куинь семьяез герӟа

Азьвыл пиоссылы вылькен ӵемысь анайёс асьсэос быръё вылэм. Котькин кензы ужез яратӥсь мед луоз шуыса сюлмаськем. Нош Татышлы ёросысь Бальзюга гуртын будэм Владимирлэн кузпаллы быръем нылашез - чебер, кузь йырсиё, веськрес мугоро, кибашлы Фидалия - анай-атайёсызлы но, Бальзюгаын улӥсьёслы но соку ик кельшем. Егит пи Фидалияез Юда гуртэ апаез доры куное вуылыкуз синйылтэм.

Туэ Фидалия но Владимир Кабипяновъёслэн ӵош улэмзылы 45 ар тырме: аръёс ӵоже шумпотонзэс но, куректонзэс но люкыса, соос туннэ но пар дыдыкъёс кадь гумыр куто, нылпиоссы понна тыршо.
Ужысь ветеран ним басьтэм кузпалъёс быдэс улонзэс колхоз ужлы сӥзизы. Фидалия апайлэн ужан сюресэз 8-тӥ класс бере ик кутскем. Атаез парсь фермаен кивалтэм, нылзэ бордаз ужаны басьтэм. Озьы пичиысен парсь утем, гужемъёсы зернотокын ужам. Бальзюгае кен луыса лыктэм бераз ик фермае сюрес лёгем, кунян утем, скал кыскем.
Владимир бригадирлэн техникая юрттӥсез, учётчик, тракторист вылэм. Депутатлэсь ужзэ но быдэсъям. Дышетскыны кылдымтэ ке но, воргорон чебер гожъяськыны, суредаськыны пӧрмытэ вылэм.
Кабипяновъёс куинь нылпи будэтӥзы. Бадӟым пизы Алёна кузпалыныз выль юрт ӝутыса потӥзы, кык пи будэто. Людвиг егит дыръяз усто спортсмен вылэм, данъян грамотаосызлэсь лыдзэс но уд потты. Комбайнэн ужакуз но азьветлӥсьёс радын лыдъяськем. Нош шоретӥ пизэс, Фридман Кабипяновез, ёросын тодӥсьтэмъёс но ӧвӧл, дыр. Со пичиысен крезьгур борды кыстӥськем. Арганэн шудыны мыло-кыдо дышетскем. Пияшлэн тыршемез юнме луымтэ. Али со – кырӟась но пӧртэм крезьгуро инструментъёсын шудӥсь музыкальной образованиен специалист. «Анай выжыосыз пала кыстӥськем», - шуо тросэз Фридман сярысь. Юдаысь ӵыжы-выжыоссы но кырӟаны ярато уго. Со сяна, Фридманлы, арлыдыз бадӟым ӧвӧл ке но, гуртын вӧсь нергеез радъяны оскемын. Со Эстоние но Финляндие вӧсяськыны вуылӥз ни. Фридман Нина кузпалыныз но Даниил пиеныз асьсэлэн юртазы уло, али выль ӝутоно корказы бордын бергало.
Пересьмон даурзэс Кабипянов кузпалъёс Ирина нылынызы но Реналь внукенызы ортчыто. Иринаез тросэз тодо гожъяськись шуыса. Солэн кылбуръёсыз «Ошмес» газетын но трос печатласькизы ни. Кылбур гожъямез ик сое кунгож сьӧры но вуттӥз - кык ар талэсь азьло со Эстониын ортчем финн-угор гожъяськисьёслэн ӧтчамазы пыриськиз. Кылбуръёсызъя куинь кырӟан гожтэмын ни. Ирина гожтӥськон вакытэ «Ошмеслы» подписка радъяны но юрттылӥз.
Фидалия но Владимир Кабипяновъёс, пенсие потыса, выль корка ӝутӥзы. Туннэ соос эркын, шулдыр корказы нылпиоссылэн вормонъёссылы шумпотыса уло, пудо вордо. Нуналлы быдэ сямен соос доры ньыль внукъёссы вуо. Песяйзы яке Ирина апайзы соосты котьку ческыт пыжиськемен пумитало. Фидалия апай но Владимир агай туж шумпото, пиоссы палэнэ ӧз кошке, Бальзюгаын уло шуыса.
Фридман но Ирина Кабипяновъёс туэ Выль Татышлы гурт поселенилэн кенешезлэн депутатъёсыз. Бальзюга гуртын улӥсьёс кылдэм ужпумъёссы ласянь та агаен сузэръёс юрттозы шуыса оско. Вордэм нылпиосынызы анай-атайзы но данъясько.
«Нылпи понна тыршиське улонын. Куддыръя висьыны ке но кутскиськом, ум сётскиське, шоканы турттӥськом, нылпиослы юрттыны быгатыкумы, улоно», - шуо Кабипяновъёс.
Анна БАЙДУЛЛИНА.
Татышлы ёрос.
Читайте нас: