Быдӟым Атыкай ожын бырем сапёръёсты буре вайыса мемориал пул усьтӥзы. Соос пӧлын вань Татышлы ёросысь удмуртъёс но.

Татышлы ёросысь Утар-Елгаысь Гадельша Бадртдинович Бадртдинов Быдӟым Атыкай оже 1941-тӥ арын кошкем. «Адӟо на меда мон тонэ, пие?» Кышкыт сюрес вылэ потэмезлэсь азьвыл, пизэ азяз пуктыса, со таӵе кылъёссэ верам. Гадельша Бадртдиновичлы кылдымтэ ни вылэм вордскем палъёсаз берытскыны. 1942-тӥ арын со сапёр-эшъёсыныз ӵош бырем. Тушмон бомба 16 адямилэсь улонзэ чигем. Соос пӧлын Татышлы ёросысь куинь адями бырем. Гадельша Бадртдиновичлэн сяна, Тверь улосвылэ Выль Татышлыысь Садиулла Гибадуллинлэн мугорыз кылем. Нош куинетӥезлэн пиосмуртлэн нимыз тодмо ӧвӧл на. Отделенизылэн командирез Уразгильдыысь Ахматша Гарейшинович Муратшин улэп кылем. Пыр-почгес лыдӟыны быгатоды газетмылэн вуоно номеръёсысьтыз.