«Шундыкарлэн» сиосыз быдэс ар шунто

Туэ «Шундыкарын» 11 отрядъёс ужазы, отчы 120 нылпи ветлӥз. Кин мар лэсьтӥз. Программистъёс, кылсярысь, удмурт чат радъязы, суредаськисьёс – адӟытон, театр ӧре ветлӥсьёс кылбуръёсын спектакль возьматӥзы, журналистъёс иворъёс но «Чонари вотэс» газет дасязы, пу ужен вырисьёс Максим Вылегжанинэн пумиськонэ солы кубок лэсьтӥзы, эстрадае но фольклоре ветлӥсьёс сярысь веранэз ик ӧвӧл: нуналъёссы крезьгурен тырмемын вал. Нош «Дӥськут дизайн» ӧрын нылъёс асьсэлы паймымон чебер дӥськут но удмурт шӧмо аксессуаръёс вуризы. Туэ «Шундыкарын» Башкортостанысь сизьым пиналъёс шутэтскизы. Лагере ветлэмез сярысь Татышлы ёросысь Выль Татышлы школаын 10-тӥ классын дышетскись Есения Гизадуллина вера:

- «Шундыкар» лагерьын кыкетӥ ползэ шутэтски. Кылем арын но, туэ но «Дӥськут дизайн» ӧнерез бырйи. Малы ке шуоно вуриськыны яратӥсько. Туэ ми ӧнерчиенымы Надежда Касаткинаен дӥськут вылэ пужыос пуктылыны дышетскимы. Дас нунал ӵоже аслым капюшоно туника вури, монисто лэсьтӥ. Ваньзэ пужыосын чебермай. Оглом верано ке, «Шундыкар» - со выжыкыл, мукет дунне, кытысь кошкем но уг поты. Отын ваньмыз тунсыко, котькуд нунал марлы ке но сӥземын луэ. Кык ар ӵоже мон аслым трос эшъёс шедьтӥ. Вурем дӥськутъёсме шумпотыса нулло.

Анна БАЙДУЛЛИНА.