Анай-атайлэн шудэз - нылпиосыз

Юрий Шарифуллинович Нияматов Шудекын вордскыса будӥз. Анаез Ментифа апай пизэ огназ будэтӥз. Юрийлы ӟеч сямъёс пыӵатон сярысь сюлмаськиз, секытлыкъёслы сётскытэк улыны, бадӟымъёсты гажаны дышетӥз. Пиез гурт котырысь ужъёслы дышыса будӥз.

Армиысь бертыса, Юрий «Победа» колхозэ шофёр луыса ужаны потӥз. Конигово гуртысь Зояен семья кылдытӥз. Зоя Николаевна трос нылпиё семьяын будӥз. Солы улонлэсь шӧгзэ но, курытсэ но веръяно луиз, дыр. Атаез улонысь вазен кошкиз угось. Тямыс классэ йылпумъяса, анаезлы юрттон вылысь, Зоя ыж утён фермае ужаны потӥз. Юрий Шарифуллиновичен улыны кутскем бераз дояркае ужаны выжиз, собере кунян утиз. Та ужысеныз ик со пенсие потӥз.

Зоя Николаевна ӝикытлыкез, чылкытлыкез гажась кышномурт. Юртъер котырыз, коркаез котьку утялтэмын. Тросэз уг тодо, дыр, кыӵе чебересь солэн пужыятэм киужъёсыз. Миндэр пуйыосаз, простыняосаз улэпесь сяськаос, кожалод. Со ужез быдэстыны кӧня дыр кулэ! Сюлэм шуныттэ поныса быдэстэм уж гинэ чебер, синмаськымон пӧрме.

Юрий Шарифуллинович но Зоя Николаевна куинь ныл вордӥзы. Соосты утялтыны юрттӥськиз анайзы - Ментифа апай. Та дыре со пӧламы ӧвӧл ни. Кузпалъёслэн нылъёссы асьсэлэн семьяосынызы уло ни. Бадӟымез нылзы Оля гуртысь ик Виктор Нурисламовен улонзэ герӟаз. Кузпалъёслэн - кык пиоссы. Саша пизы УдГУ-ын дышетскиз, Янаулысь водоканалын мастер луыса ужа. Янис пизы ИжГТУ-эз быдтӥз. Али армиын служить каре, кинологлэсь ужзэ быдэсъя. Сашаен Алёналэн Лиза нылзы будэ. Кузпалъёс выль микрорайонэ туж чебер корка ӝутӥзы. Егит кузпалъёслы та бадӟым ужзэс быдэстыны Юрий Шарифуллиновичен Зоя Николаевна но бадӟым юрттэт возьматӥзы.

Нияматовъёслэн Галина нылзы Можга гуртысь Владислав Файзуллинэн семья кылдытӥз. Соос Шудеке корка ӝуто. Кузпалъёслэн Даша нылзы семьяеныз Ижевскын улэ, Валдис пизы Нефтекамскысь нефтяной колледжын дышетске.

Зоя Николаевналэн но Юрий Шарифуллиновичлэн Эвелина нылзы Можга гуртэ выжы лэзиз: улонзэ Альфир Башировен герӟаз. Соослэн Костя пизы Чайковскийысь крезьгуръя колледжез йылпумъяса, Янаулысь нылпиослы искусствоосъя школаын ужа. Полина нылзы школаын дышетске.

Аслэсьтыд шуддэ ачид дуриськод шуо ке но, улон анай-атай бордысен кутске: пинал ваньзэ соослэсь адӟем карыса будэ. Зоя Николаевнаен Юрий Шарифуллинович нылъёссэс быгатыса, визь-кенеш сётыса будэтӥзы. Соос ог-огзылы юрттыны котьку дась. Малпасько, озьы ик улоно, дыр, та югыт дунне вылын. Соку ӵуказе нуналлы осконмы но юн луоз.

Мария АЛЕКСАНДРОВА.

Янаул ёрос.