+19 °С
Салкым
Антитеррор
Вань иворъёс
Общество
29 августэ 2019, 14:25

Аръёс бызись ву кадь ортчо

Юда гуртын улӥсьёс тросэн ӟазег вордо. Гуртэн вӧсязы вуылыку, бакча бераз ӟазегпиоссэ утись пересь апаен тодматским. Тямыстон аресъем кышномурт чырткем ай, тылобурдоосыз нокытчы уз пегӟе.

Фарига Садрисламовна Миниева – Выль Татышлыысь. Дас сизьым аресказ, колхозысь справка басьтыса, арессэ бадӟыматыса, со Басьянэ ветлэм. Свердловск улосвылысь торф поттон ужын кӧня ке коньдон тыро вал бере, Фарига апайлэн огъёзоосыз тросэз со уж пыр потэмын. Озьы егит нылъёс асьсэды дӥсяллям.
Фарига апай Юда гуртэ Садрихан нимо егит пилы вылькен луыса лыктэмын. Ужам «рядовойын», тямыс ар парсь утёнын но тыршем. Кузпалыныз кык ныл но кык пи будэтӥллям.
Бызись ву кадь ортчизы аръёс. Фарига апайлэн гумыр карем Садриханэз туннэ нуналэ ӧвӧл ни. Нылпи кайгу но адӟоно луэм солы – Пермь шаерысь Барда ёросын улӥсь Валя нылызлэн улонэз вазен чигем. Пересь даурзэ Фарига Садрисламовна Аркадий пиеныз, Альфина кенэныз но соослэн нылпиосынызы ортчытэ. Туннэ нуналэ солэн тямыс внукез но сизьым правнукез. Арлыдо песянайлэн ужтэк ёрмыса пукемез ик ӧвӧл. «Быгатыкум маке но лэсьтоно», - шуэ со. Юртъер котыразы берган сяна, Фарига апай киужен но вырыны усто. Керттэм носки-тапочкиосыз ӝыны мешок люкаськиллям ни.
Керттӥськыны но вуриськыны мӧйы кышномурт пиналысен дышетскем. «Анкаелэсь адӟыса улӥсько вал. Озьы ик дыши. Дэра но куэме вань. Басьянысь сӥньыс ваи но аслым кэртэлы (авт. - кечато карыса куэм дэраез озьы шуо) дэрем вури», - удмурт дӥськутъёссэ возьматыса вера Фарига апай. Ӵыжы-выжыоссэс куное ӧтчало ке, кыӵе ке ужрад, вӧсь ке луэ, со одно ик соосты дӥся. Берло тунсыкъяськонэз – крючокен керттӥськон. Пукон вылэ синмаськымон чебересь накидкаос керттылэ со. Ӵем дыръя ӵыжы-выжыосызлы кузьма. Фарига апайлэн синъёсыз гинэ мед адӟозы, азьпалан но киужъёсыныз шумпоттоз ай.
Анна БАЙДУЛЛИНА.
Татышлы ёрос.
Читайте нас: