Коркалэн шунытэз улӥсьёсыз бордын

Газетэз лыдӟисьёсты солэн чебер керттӥськись, крючокен чильпаськись Рая апаеныз тодматӥм вал ини. Рая но Люда сяна, татын анайзы Зоя Армагиновна но Людалэн кузпалыз Альфир уло.

Кык нылъёслэн атайзы куке но Вылысь Тыхтемысь гуртазы куное лыктэм нылэз синйылтэм. Егитъёс ог-огзылы кельшиллям. Бӧрысь Гаяз эшъёсыныз мотоциклэн Зояез вылькенлы ваем. Яратоно Калтасы палъёсызлэсь трос иськемъёслы кыдёкын ке но улоно луэм, Зоя Армагиновна улонэзлы уг ӝожтӥськы: кузпалыз ӧвӧл ни ке но, бордаз кык нылъёсыз.

Азьло Людмила Гаязовна картэныз но пиеныз Агидельын улэм. Собере кузпалыныз анай-атайзэ но апайзэ утьыны вордскем гуртаз бертоно луиз. Людмила Гаязовналэн кузпалыз профессиезъя - изолировщик. Со уйпалан ужа. Котьма лэсьтыны быгатӥсь пиосмурт дораз но ужтэк пукыны дышемын ӧвӧл. Апаен сузэръёс но котьмалы усточиос. Рая пужыятскыны, керттӥськыны яратэ. Пӧрмем ужъёсыз сярысь со туж мылкыдо вера. «Кофтаос, тапочкиос, носкиос, сяськаос, салфеткаос керттӥсько. Азьло керттӥськонъя журналъёс басьтӥсько вал. Туала улонын интернет ваньзэ вера, возьматэ, дышетэ», - шуэ со. Раялэсь киужъёссэ котьку адӟытонъёсы нулло, гуртазы лыктэм куноослы возьматъяло. Людмила Гаязовналэн дырыз матысь адямиоссэ ческыт пӧрамъёсыныз утялтонэн, корказэ но дор котырзэ чылкыт возёнэн герӟаськемын. Кык теплицаосаз помидор, кияр будэтэ. Азбарзэс, улэп сяськаос сяна, Людмилалэн ас киосыныз лэсьтэм сяськаосыз но шулдырто.

Нылъёс, анайзылэсь адӟем карыса, киуж борды кыстӥськиллям, вылды. Зоя Армагиновна но егит дыръяз чильтэръёс керттылэм. Жаляса верано, 70 аресъем кышномуртлэн али синъёсыз ляб адӟо. «Вордскем гурттылэсь мӧзмиськоды на-а?» - юасько Зоя апайлэсь.

- Кызьы уд, - шуэ со. – Анае но берло аръёссэ татын улӥз, татчы ватӥм ке но, вордскем палъёс бордазы кыско.

Зоя апай татчы бызем бераз улыны кутскемзэ, нылъёсызлэсь будэмзэс, ташкичиослэсь азьло Быдӟымнал праздникез ортчытэмзэс но тодаз ваиз:

- Будӟиннал туж шулдыр ортче вал. Курегпуз питратса шудо вал уакъёс (авт. - пичи нылпиосты татын озьы шуо). Соос коркась корка ветло вал, 40 курегпуз пыжиськом (авт. - таиз кыл ташкичиослэн вераськоназы «пӧзьтыны» шуэмез возьматэ) вал. Нырысетӥ луыса пырись малай муртэ (пиез) миндэр вылэ пуктоно, утёно тылобурдоос мед далтозы, улон капчи мед луоз шуыса. Малайёслэн пыдзы капчи шуыса озьы каро вал.

Та шуныт но шулдыр коркась потэме потытэк кошки. Отын улӥсьёсын пумиськыны мед кылдоз на. Тазалык но кузь гумыр ваньзылы.

Анна БАЙДУЛЛИНА.