Улон сюрессы - калыклы синмаськымон

Яратӥсь сюлэмъёс ӝытъёсы клубын пумиськылӥзы, Шады шур дурын юмшазы. Озьы ньыль ар ортчиз. Одӥгаз тол ӝытэ Анфисьяез вылькенлы ваизы. Касим анай-атаеныз но сузэръёсыныз улэ вал. Гужем соос шулдыр сюан ортчытӥзы.

Кузпалъёслэн вить нылъёссы вордӥськизы. Школаез йылпумъяса, Миля Ижевскын экономистлы дышетскиз, Эвелина медсестра луиз, Эльза но Элеонора Нефтекамскын дышетӥсьлы тодон-валан басьтӥзы, Эльвира поварлы дышетскиз. Та дыре соослэн котькудзылэн семьязы вань ини.

Анаймы Анфисья Галимзяновна атаен Касим Шайхутдиновичен 50 ар ӵош уло ини. Ӝоген соос зарни сюанзэс пусъёзы.

Анаймылэн уж сюресэз колхозын ортчиз: парсь но кунян утиз, фермаен кивалтӥз, кӧня ке ар заправщица но луиз. Со трос аръёс Шудек сельсоветын депутат но вал. Азьло гуртын трос пудо - скал, парсь, ыж, ӟазег, курег - вордылӥзы. Фермаысь бертыса, анаймы соосты утялтыны но вутскылӥз. Ужез яратэмез солэн трос грамотаосын пусъемын. Нош 1981-тӥ арын БАССР-ысь Верховной Советлэн Президиумезлэсь Данъян грамотазэ сётӥзы. Вить нылпи будэтэмез понна анаймес «Медаль материнства» медален но пусйизы.

Анаймы ужтэк пукыны уг чида, со киужен выре. Соосын конкурсъёсы, выставкаосы пыриське. Нош пӧраны ке кутске, олокыӵе но сиён-юон пӧрмытъя. «Телевизорысь кыӵе ке выль рецепт кылӥсько ке, атайдылы одно ик пӧрасько»,- вера со. Соин ик пичи внучкаосыз но внукъёсыз ӵужайзы но ӵужатайзы дорын кунояны ярато.

Атаймылэсь нимзэ тросэз тодо, угось солэн быдэс улонэз культура удысэн герӟаськемын. 1981-тӥ арын «Башкортостан Республикаысь культура удысысь сиё-дано ужась» дано ним сётэмын. «Котьку капчи мылкыдо, ужез, улонэз яратӥсь, котькыӵе ужрадъёсы пыриськись», - верало со сярысь гуртын. Ас ужзэ лэсьтон сяна, со мукет ужъёсты но быдэсъяны вутске вал. Гужем сое бусы ужасьёс пӧлысь адӟыны луылӥз, нош толалтэ – фермаысь. СДК-лэн директорез дыръя но, библиотекаын ужакуз но со кыӵе гинэ ужрадъёс уг ортчытъя вал! Атаймы Ижевскысь культпросветучилищеез йылпумъяз угось. Шудек сельсоветэн кивалтыкуз но со та ужзэ ӧз вунэты. Нош али атаймы - Эменлык вӧсьын куриськись. Анаен-атай гуртысь клубе ӵем вуыло, соос «Тюрагай» фольклор коллективе пырисько.

Витьтон ар ӵошен вамыштон – ӧжыт-а со яке трос-а? Аръёс ортчо ке но, анаен атайлэн мылкыдзы уг пересьмы. Соос улонзэс артэ ортчо, пиналъёслы тодон-валанзэс, быгатэмзэс сёто. Ми но улонмес соос кадь калыклы синмаськымон ортчытыны малпаськом. Сӥзиськом соослы шудо кема улон, тазалык.

Элеонора

МИНГАЗИЕВА.

Янаул ёросысь Каймашабаш гурт.