Спортэн эшъясько, ужрадъёсы пырисько

Таяз аре республика ужрадэ пыриськыны но Нефтекамск электросетьлэсь данзэ утьыны Станислав Хасаняновлэн семьяезлы шуд усиз. Выль Татышлыысь Станислав Витальевич Татышлы ёрослэн электросетяз мастер луыса тырше. Со аслэсьтыз удыссэ ӟеч тодэмез сяна, спортэн но эшъяське. Станиславез ӝӧквыл теннисъя, волейболъя ӵошатсконъёсысь ӵем пумитаны луэ. Ужрадъёсысь со трос дыръя вормонэн бертэ. Спортэн эшъяськемзэ лыдэ басьтыса ик, луоз, сое семьяеныз гужем спартакиадае вазизы. Станислав Любовь кузпалыныз но Яна нылыныз семейной эстафетае пыриськизы. «Ужрадэ 28 командаос вуэмын вал. Отчы анай-атай но одӥг нылпи пыриськыны быгатӥз. Эстафетаын тунсыко заданиосты быдэсъям», - вера Любовь. Семейной эстафетаын Хасаняновъёс асьсэды умой возьматӥзы. Ужрадысь соос капчи но задор мылкыдын бертӥзы.

Марина НИКОЛАЕВА.

Татышлы ёрос.