Котькуд ӵошатсконысь - вормонэн

«Сельские спортивные игры» улсын ортчись ёрос ӵошатсконъёсын ньыль ар ини нырысетӥ интыез улысь балтачъёс уто. Командалэн вормонъёсаз Вылысь Балтачын улӥсь Оксана Ушияровалэн но люкетэз бадӟым.

Оксана школаын дышетскыкуз ик спортын кужмо луэменыз висъяськылӥз. Ӝӧквыл теннисъя, волейболъя, капчи атлетикая, куасэн бызьылонъя но гимнастикая ӵошатсконъёсысь со ноку ӧз кыльылы, дышетсконо школаезлэсь данзэ быгатыса утиз. Табере быгатонлыкъёссэ гурт поселенилэн командаяз эскере.

- Дышетсконме йылпумъям дырысен гурт поселенилэн командаяз лыдъяськисько. Школа бере 15 медаль но 20 Данъян грамота утэмын ни, - вера О. Ушиярова. – Мон понна валтӥсь интыын луэ ӵошатсконъёсы пыриськон. Спорт ужрадъёсы мыныку, мон ноку нырысетӥ инты сярысь уг малпаськы.

Ёросын, кылсярысь, арлы быдэ Радик Рахимовлэн кузьымезлы ӝӧквыл теннисъя ӵошатскон ортче. Отчы бускель ёросъёсысь командаос но вуо. Но О. Ушияровалэн со ӵошатсконысь медальтэк бертэмез ӧвӧл.

Спорт котькуд адямилэн улоназ бадӟым инты басьтэ: тазалыкез юнматэ, мылкыдэз ӝутэ. Оксана сое ӟеч тодэ. Соин ик ваньмон дырзэ спортлы сӥзьыны тырше. Ужаз но солы юн тазалык, кужым кулэ, малы ке шуоно со «Рассвет» СПК-ын пӧртэм ужъёсты быдэсъя.

Миляуша БУЛАТОВА.

Татышлы ёрос.