МФЦ-ын кыӵе выль услугаос кылдӥзы

Кызьы воштӥське МФЦ-лэн ужез, матысь дыре кыӵе выльдӥськонъёс луозы? Со сярысь правительстволэн оперативной совещанияз вераз Башкортостанысь МФЦ-ен кивалтӥсьлэсь ужзэ быдэсъясь Гульшат Арсланова.

Выль услугаос

Республикаысь Кун услугаосъя gosuslugi.bashkortostan.ru порталэн огӵош ужаны луонлык кылдытэмын. Адямиос та дыре куинь услугаосын пайдаяськыны быгато: архивысь справкаос но копиос сётон, музъем участоклэсь градостроительной планзэ сётон но кадастровой планъя земельной участоклэсь кытчы интыяськемзэ пусъён. Таӵе ужан амал ужез трослы капчиятэ: МФЦ-лэн сайтаз заявление гожтӥськод но собере документъёстэ басьтыны лыктӥськод. Олокӧня пол МФЦ-е ветлонэз ӧвӧл. Матысь дыре выль услугаослэн лыдзы йылоз. Кылсярысь, улон юртлы кулэяськисьёслэн радазы султон, улон юртад перепланировка лэсьтыны завление гожтон но мукет.

Таиз дышетскон арысен выль эксперимент кутскоз: МФЦ-осын ужасьёс школаосы мыныса, 14 арес тырмем нылпиослы паспорт лэсьтозы.

Инвожо толэзьысен республикась дас ньыль МФЦ-осын (Уфа, Октябрьский, Нефтекамск, Салават, Стерлитамак, Бирск, Мелеуз, Туймазы, Кумертау, Сибай, Ишимбай, Белебей но Учалы) выль образецъя загранпаспорт басьтыны луэ.

Уфаын выль офисъёс

усьтэмын

Шоркармылэн администрациеныз кенешыса, Затон микрорайонын но «Дёмаын» выль залъёс усьтыны чакламын.

Телефон пыр

гожтӥськыны луэ-а?

Гудырикошкон толэзьысен «Мои Документы Онлайн» мобильной приложение ужаны кутскоз. Со МФЦ-ос сярысь тодыны юрттоз. Приложение пыр госпошлинаосты, штрафъёсты но налогъёсты тырыны луоз.

Ужбергатӥсьёслы

Таяз арысен ужбергатӥсьёс но юридической лицоос понна нимысьтыз укноос усьтӥськозы. Отын соос 150 пӧртэм услугаосын пайдаяськыны быгатозы. Та вакытэ бизнес-укноос ужало Уфаын, Белорецкын. Матысь дыре бизнес-укноос ужаны кутскозы Стерлитамакын, Туймазыын, Салаватын, Нефтекамскын но Ишимбайын.

Офисъёс огкадь ужало

Ар кутсконысен черодын сылон дыр вить поллы кулэсмиз. Черодын сылӥсь котькуд адямилы шорлыдын 5 минут но 34 секунд дыр кулэ.

Туэ куартолэзьысен МФЦ-лэн 15 офисъёсаз тупатъян ужъёс лэсьтэмын. Огъя 29 офисъёсын тупатъян ужъёс лэсьтыны чакламын. Та ужъёс коньывуон толэзь пумозь йылпумъямын луозы. Озьыен, офисъёслэн 88 процентэз «Мои Документы» брендлы тупалозы. Мукет регионэн ӵошатон дыръя, республикамы та ужъёсты быдэстонын нырысетӥос пӧлын лыдъяське.

Дорысь потатэк

Услугаосын дорысь потатэк но пайдаяськыны луэ: интернет пыр gosuslugi порталысь солэсь региональной люкетсэ - gosuslugi.bashkortostan.ru – бырйыса, отын госпошлинаез 30 процентлы ӧжытгес тырыны луэ, ГИБДД-лэсь штрафъёссэ – 50 процентлы. Отын ик эскерыны луэ, тырымтэ штрафъёсты, налогъёсты ӧвӧл-а шуыса. Эмчи доры гожтӥськыны, машинадэ регистрировать карыны луэ но мукет.

Дасяз Миляуша

НИГАМАТУЛЛИНА.