Тыршись анай-атай вӧзын нылпиос но ужлы дышыса будо

Люция Ивановна кунянъёсты уте, соос тазаесь мед будозы шуыса сюлмаське. «Берлось ньыль арзэ кунянъёс бордын тыршисько. Соос мынам 120-лы матэ лыдъясько. Огнам ужасько, - вера кышномурт. - Талэсь азьвыл кема аръёс ӵоже скал кыски. Огъя верано ке, колхозын куамын арлэсь кема ужасько ни». Люция Ивановналэн ужез БР-ысь Гурт хозяйствоя министерстволэн Данъян грамотаеныз пусъемын. Декрет отпускын дыръяз но солэн ужтэк пукыны сюлмыз чидамтэ. Нуныезлы арес но ӝыны тырмем бере, кышномурт гурт хозяйствоысьтызы столовое вамыштэм. Бусыын ужасьёсты пӧсь сиёнэн куноям. Соку анаезлы Диана нылыз но юрттӥськем. Азьпалтыса верало, та семьяын пичиысен ужлы дышыса будо.

Люция Ивановна но Владимир Шайдиярович вить нылпиослэн анайзы но атайзы луо. Калтасыын улӥсь Андрей, Нефтекамске интыяськем Сергей пиоссылэн но та дыре атай юртазы улӥсь Диана нылзылэн асьсэлэн семьяоссы ни. Таня нылзы туэ куатетӥ классэ вамыштоз. Жаляса верано, Алёна нылзылэн улонэз вазь уриз. «Алёна нылмес висён дырызлэсь вазь «басьтӥз». Солэн югыт дуннеен люкиськемезлы тямыс ар луиз ини, - пушкыз тырыса, синкылиос пыр вера Люция Ивановна. – Нылмы аслаз семьяеныз улэ вал. Кык ареслэсь бадӟым Кирилл пиез кылиз. Али со Калтасыын улэ. Кириллмы милемыз уг вунэты, каникулъёсы вуылэ. Нылпиосмы умой дышетскизы. Визьмоесь но ӟеч сямо луизы. Танямы но умой оценкаосын шумпоттэ». Шафиков кузпалъёс нылпиоссы школаез йылпумъямзы бере но тодон-валан мед басьтозы шуыса тыршизы. Али соос пӧртэм удысъёсын ужало ке но, анай-атай юртсэс уг вунэто. Гужем юрттӥськыны ӵем бертыло, тужгес но турын вакытэ. Пудо сиён трос дасяно луэ, малы ке шуоно гурт хозяйствозы уждунзэс пичи тыре. Соин Люция Ивановна уждунзэ трос дыръя пудоен басьтэ.

Владимир Шайдияровичен пумиськыны ӧз кылды. Со берлось сизьым арзэ Нефтекамске ветлыса ужа. Солэсь азьвыл кызь арлэсь кема фермаын скотникын тыршем. Кузпалъёслэсь уждурысьтызы вуэмзэс доразы Савелий внуксы чидатэк возьма. «Корка пырем бере ик хрю-хрю шуыса киям ведра сётэ. Собере ураме ӧте», - нунокез шоры учкыса, мыньпотыса вера Люция Ивановна. Табере кузпалъёслэсь юртсэс нылпиоссылэн нылпиоссы шулдырто ни.

Марина НИКОЛАЕВА.

Калтасы ёрос.

Туспуктэм вылын: Л. Шафикова Таня но Диана нылъёсыныз, Савелий внукеныз.