"Инкуазез туж яратӥсько"

- Мон вордӥськи Калтасы ёросысь Шыльныр (Вылысь Тыхтем) гуртын, 1969-тӥ арын 3-тӥ толшоре, - ас сярысьтыз гожтэ А. Никитин. – Мыным куать толэзь гинэ вылэм ай, анаен атай анаелэн гуртаз, Янаул ёросысь Коньгае (Конигово), улыны выжиллям. Отын ортчиз пичи дыры. Шудекысь шор ёзо школаын дышетски. Собере Уфаысь аграрной университетын тодон-валан басьтӥ.

1994-1999-тӥ аръёсы А. Никитин «Ӟечбур!» газетын ужам.

- 2009-тӥ арын сюлэмлы операция лэсьтӥзы. Секыт ужаны уг яра вал. Со дырысен гожъяськон ӧре мургес выйи, шуыны луоз. Юморескаос гожъян борды басьтӥськи. Гожъяськыса капчигес но луэ, мылкыд ӝутске, тыбырысьтым секыт изэз куштӥсько кадь. Мылкыд ке капчи, олокыӵе секыт ужъёс но капчи пото, шуг-секытъёсты но ӝог ортчыны луэ. Туннэ нуналэ 30-лэсь трос юморескаосы лыдъясько.

А. Никитинлэн нылпиослы веросъёсыз но вань. Соос «Ӟечбур!» газетын печатласькиллям. «Инкуазез туж яратӥсько. Соин, лэся, улонам луэм учыръёсме но инкуазь суредъёсын герӟаса гожтӥсько», - шуэ А. Никитин.

"Бӧрдод но, серекъялод но" серемес вероссэ лыдӟе газетлэн 29-тӥ номерысьтыз.