Кышкыт ӧвӧл кужмо тӧлъёс

Клара но Финнат Хакимовъёсты гурт клублэн сценаез тодматэм, шуыны луоз. «Азьло бускель гуртъёсы концертъёсын ӵем ветлӥськом вал. Байшадыос ми доры лыктӥзы но, соку ик тодматским», - вера Балтач ёросысь Шавьяды гуртын вордӥськыса будэм Клара апай. Вераны кулэ, кузпалъёслэн егит дырысьтызы кырӟан-эктон мылкыдзы али но сӥямтэ. Соос гуртысьтызы «Туганэ» фольклор ансамбле ветло. «Клубамы радъяськись ужрадъёсы пыриськыны тыршиськом», - шуо соос.

Хакимовъёслэн юртазы пырыку ик шӧдӥське: кузё кышно сяськаосты яратэ. Кыӵеосыз гинэ ӧвӧл! Оранжереяе шеди, кожалод. Клара апай керттӥськыны но яратӥсько, пе. Финнат агайлэн но тунсыкъяськонъёсыз вань. Со вашкала ужез азинтэ шуи ке но, уг янгыша, дыр. Кибашлы пиосмурт бадьпу вайёслэсь кудыос, вазаос керттэ. Та уженыз со толалтэ, ваньмон дырыз луыку, выре. Малы ке шуоно Хакимовъёслэн гид тыр пудооссы. «Ньыль скал вордэм дырмы но луиз. Йӧлзэ, вӧйзэ, йӧлвылзэ вузаны секыт луэмен, пудоосты кулэсмытом шуимы. Али кык скал, ыжъёс, ошъёс вордӥськом», - шуэ Клара апай. Гужем Хакимовъёслэн азбарзы чипы-курегъёсын тырме.

Кузпалъёслэн уж сюрессы сярысь верано ке, со гурт удысэн герӟаськемын. Азьло соос кыксы ик Мичурин нимо СПК-ын ужаллям. Али байшадыос тросэз гуртысьтызы ужбергатӥсьлэн Г. А. Гильмаутдиновлэн хозяйствояз тыршо. Финнат агай отын 2001-тӥ арысен механизаторын ужа.

Котькуд адямилэн улоназ семья валтӥсь инты басьтэ. Тупаса улӥсь семьялы кужмо тӧлъёс но кышкыт ӧвӧл, шуо. Та веранлы Хакимов кузпалъёс но дурбасьто. «Ог-огдэ валаса, паредлы оскыса улӥд ке, вань секытлыкъёсты вормыны луэ», - шуо соос.

Миляуша БУЛАТОВА.

Бурай ёрос.