Витетӥ гудырикошконэ "Усточикар" лагерь ӧсъёссэ усьтоз

Бадӟым ужез вормыны удмурт огазеяськонлы коньдон ласянь юрттозы Башкортостанысь Егитъёслэн политиказыя кун комитет но Калыкъёслэн эшъяськон юртсы.

Лагерьлэн ужпумъёсыз: удмуртъёслэн культурно-этнической узырлыкъёсынызы тодматон; нылпиослэсь быгатонлыкъёссэс шараян но волятон; ужез но вордскем шаердэ гажаны дышетон; ог-огдэ валан, гажан мылкыд пыӵатон но мукет.

Лагере лыктыны быгато 6-10-тӥ классъёсын дышетскись, удмурт кылэз тодӥсь пиналъёс. Соослэн сьӧразы таӵе документъёссы луыны кулэ: вордӥськемзы сярысь свидетельствозылэн яке паспортсылэн (пропискаен) копиез, ИНН, пенсионной страховой свидетельство, дерматологлэн но педиатрлэн йылпумъянъёсынызы ф.079-У медицинской справка, СЭС анализъёслэн результатъёссы, инфекционной висисьёсын кусып возьымтэзы сярысь справка (ф. №291), «Ошмес» газетлы 2019-тӥ арысь кыкетӥ паларлы гожтӥськемзы сярысь квитанция но удмурт дӥськут. Котькуд нылпи понна анай-атай 2800 манет коньдон тыроз.

Пиналъёсты лагерь таӵе адресъя вите: Башкортостан, Татышлы ёрос, Вязовка гурт, Комаров нимо ужан но шутэтскон нылпи лагерь. «Усточикар» 10 нунал ужалоз.

Творческой лагерьлэн программаез: анай кыллы но культуралы дышетон, творческой мастерскойёсын ужан, спортивно-оздоровительной но культурно-массовой ужрадъёс радъян.

Нуналлэн радлыкез:

9.30-13.00 - творческой мастерскойёсын ужан;

14.00-16.00 – спортивно-массовой ужрадъёс;

17.00-19.00 – ӝыт ортчись ужрадэ дасяськон;

19.30-21.00 - конкурсъёс, викторинаос, КВН но мукет ужрадъёс;

21.00-22.30 – дискотека.

Творческой мастерскойёс:

«Кызьпу туй», «Дӥськут дизайн», «Эстрада», «Фольклор», «Театр», «Журналистика».

Кылдэм юанъёсын БР-ысь историяя но культурая центре (34778) 3-21-91 номеро телефонъя вазиськоно, e-mail: [email protected] Озьы ик вазиськыны быгатӥськоды БР-ысь удмуртъёслэн НКЦ-енызы кивалтӥсьлы Салимьян Гарифуллинлы (8-937-155-43-44, 8-927-323-14-03) яке лагерен кивалтӥсьлы Фанил Нуриахметовлы (8-999-132-02-43).