Вань иворъёс
Общество
10 Июля 2019, 16:16

"Семья - улонлэн инъетэз, со улыны но ужаны кужым сётэ..."

Тямысэтӥ пӧсьтолэзе Бирск городын семьялы сӥзем республика фестиваль ортчиз. Отчы Башкортостанлэн Тӧроезлэсь ужзэ быдэсъясь Радий Хабиров но пыриськиз.

Ужрад кутскытозь, республикаен кивалтӥсь городын улӥсьёсын пумиськиз-вераськиз, интыысь кибашлыослэн ужъёссылы сӥзем адӟытонъёсын тодматскиз. Фестивале люкаськемъёсты но Башкортостанын улӥсьёсты праздникен ӟечкыласа, Радий Фаритович шуиз:
- Семьялэсь, яратонлэсь нуналзэс арлы быдэ Бирскын ортчытон йылоллы пӧрмоз. Та городэ люкаськыса, матысьёсмылы, гажано но яратоно адямиосмылы тау кылъёсмес вераломы, малы ке шуоно семья – улонлэн инъетэз, со улыны но ужаны кужым сётэ. Асьмеос семья понна улӥськом.
Республикамылэн улоназ но азинсконаз трос кужымзэс понэм, семья дунлыкъёссэс, йылолъёссэс быгатыса утись но соосты выжыысь выжые выжтон сярысь сюлмаськыса улӥсь, данъяськымон нылпиос будэтэм семьяосты – Стерлитамакысь Василя но Айрат Зариповъёсты, Мишкино ёросысь Мария но Андрей Михайловъёсты, Бирск ёросысь Ирина но Александр Федоринъёсты, Куюргазы ёросысь Татьяна но Константин Сергеевъёсты - регионэн кивалтӥсь «Родительская доблесть» медальёсын пусйиз.
Фестивале республикаен кивалтӥсьлэн кузпалыз Каринэ Хабирова но вуылӥз. «Ваньдылы сӥземе потэ - семьяосамы ог-огдэ утён мед луоз. Семьяын кылдэм шунытлыкенымы матысьёсмес но шунтыны мед быгатомы», - вераз Каринэ Хабирова.
Люкаськем калыкез праздникен ӟечкыланы Башкортостанысь правительстволэн вице-премьерезлэсь ужзэ быдэсъясь Ленара Иванова но вуылӥз. Со кызь вить ар ӵош улэм, адӟем карымон кузпалъёслы «За любовь и верность» медальёс сётӥз. Со сяна, шуныт кылъёссэс веразы «Матери России» Быдэсросси движениен кивалтӥсь Валентина Петренко, Кун Думаысь депутат, Россиысь паралимпи комитетлэн вице-президентэз Рима Баталова но мукетъёс.
Ужрадэз шулдыр концерт азьланьтӥз.Отын чузъяськем кырӟанъёс, задор эктонъёс котькинлэн сюлмаз ӟечезлы оскон тылгизьы кенжытӥзы.
Дасяз Миляуша БУЛАТОВА.