Ог-огдэ кылыны быгатоно

Яратон, ог-огдэ валан, гажан, анай-атаез но аслэсьтыд бадӟымъёсыз сӥлы карон, лякытлык, юрттӥськон, матысьёсыд понна кыл кутон – таӵе дунлыкъёсыз утьыса возид ке, семьялэн инъетэз юн но кемалы луоз. Мукет ласянь ке учконо, дор, корка кин бордын возиське? Кышномурт бордын. «Улон нылкышно бордысен кутске. Умой кышномурт – ӝыны юрт», - юнме уг шуо калыкын. Нылкышно кузпалыныз ваньзэ валче кенешыса лэсьтӥз ке, кузпалзэ кылыны быгатӥз ке, соку яратон но уз пегӟы, коркан ог-огдэ валан но гажан кузёяськоз. Вылӥын верам кылъёс Балтач ёросысь Асавка гуртын улӥсь Алёна но Алмаз Валинуровъёслы туж тупало.

Татышлы ёросысь Петропавловка гуртысь Алёна егит дыръяз та гуртэ ӵыжы-выжыосыз доры куное ветлыкуз уг но малпа вылэм, куке но татчы мур выжы лэзьыса, аслаз семьеныз улоз, нылпиоссэ будэтоз шуыса. Сьӧд йырсиё нылашлы Асавкаысь Алмаз нимо пияш синмаськем. Дас вить ар ӵоже соос оглулысь-сюлмысь уло ни. Сабырлы, ужась, котькинэн огкыл шедьтыны быгатӥсь шуыны луысал Петропавловкаысь татчы бызем кышномурт сярысь. Со гуртысьтызы нылпи садын ужа, дорзэ утялтыны но вутске. Алмазэз тулысысен бер сӥзьылозь гурт калыклэсь кулэяськонъёссэ быдэсъя. Али но солэн кысык вакытэз. Со аслаз трактореныз кытчы гинэ ужаны уг вуылы. Турын дасян вакыт сое ӧтисьёс ӧжыт ӧвӧл, уж ачиз сое шедьтэ. Дышетскемезъя но со тракторен ужаны тодон-валан басьтэмын. Турын турнанэз, турын берыкъянэз, прессэз, герыез, тележкаез но тракторез кузёзэ котьку возьмало. Гуртоосыз Алмаз сярысь шуныт кылъёс гинэ верало. «Мынам бур киы со. Огпол но «уг» шуэмез ӧвӧл. Туж капчи соин ужаны», - вера «Шаймарданов» фермер хозяйстволэн кузёез А. А. Шаймарданов.

Али гурт сыӵе адямиос вылын возиське. Танып вамен выж лэсьтон борды но Алмаз трос кужымзэ понӥз. Табере варманаез но варматаез доры вуылыны кыдёкын уз луы ни.

Валинуровъёслэн азбаразы радэн-радэн муш умортооссы сыло. Ми ветлон нунал но огез палдэм вал. «Мушез Алмаз уте. Со дорын ӧвӧл дыръя палдэ ке, асьмеос октӥськом ини, мар карод. Чечызэ ӵошен кыскытӥськом», - вера кузё кышно. Егитъёс Никита пиенызы но Ника нылынызы, анаенызы - Фануза апаен - ӵош уло. Пересь кышномурт пиналъёслы быгатэмъяз юрттӥське, азьпалан тазалыкез гинэ мед луоз шуыса куриське. Со вылын – семьялы сиён пӧзьтон но гужем тылобурдоосты утён. Мушсылэсь палдэмзэ но со чакласа улэ. Вераны кулэ, Фануза апай кемаласен «Ошмесэн» эшъяське. Кызь ар ӵоже потэм газетъёсысь тодмоосыз сярысь материалъёсты со утьыса возе, милемлы но возьматӥз.

Валинуровъёс трос пудо вордо. Вить яке куать ош тол поттыса, сӥльзэс вузало. Туэ тани Асавка котырысь вить гектар музъеме чабей но сезьы кизьыны дӥсьтӥзы. Пудозылы ю тысь палэнысь басьтоно уз луы ни. Ю-няньзэс октыны техникаен А. А. Шаймарданов юрттоз.

Нылпиоссы Никита но Ника школаын дышетско. Дас вить аресъем агаез сузэрезлэн ӟуч кылын вераськемезлы пайме но сое исаса кадь, «ӟуч-а оло тон, ӟуч сямен вераськиськод» шуэ. Будэмезъя Ника но, оло, анай-атай кылызлэсь кулэлыксэ валалоз.

Улыны но быгатэм кулэ, шуо. Валинуровъёс улыны, ужаны, бускельёсынызы, гуртоосынызы огкылысь луыны быгато.

Анна БАЙДУЛЛИНА.