-15 °С
Лымы
Антитеррор
Вань иворъёс
Общество
27 Июне 2019, 10:24

"Гуртын но городын кадь улыны луэ"

Вордскем гуртад, дуно калыкед пӧлын, бускельёсыныд анай кылыныд вераськыса-кенешыса улонлэсь ӟечез ма меда вань? Сое валало но дунъяны быгато, дыр, аръёс ӵоже палэнын улыса гуртэ берытскем адямиос гинэ.

Марина Хаматнуровна но Анатолий Галямович Апкаримов кузпалъёс трос аръёссэс Уйпалан, Ямало-Ненецк автономной округысь Муравленко городын ортчытӥзы. Калтасы ёросысь Бадӟым Качак гуртэ соос Мариналэн дышетонъя стажез тырмем бере берытскизы. Нош Анатолий вордскем палъёсаз вуыса, “Восход» ООО-ын водитель луыса ужаз на, Вуж Турай гуртэ ветлӥз. Бертон мугзы луиз анай-атайёссылэн пересьмемзы. Соослы юрттоно шуизы. Вордскем палъёс но бордазы кыскизы, вылды.
Мариналэн быдэ вуон вакытаз тросэз огъёзоосыз, школаез йылпумъяса, педучилищее мыныны туртто вал. Соку дышетӥсь луон дано лыдъяськиз уго. Тямысэтӥ классэ йылпумъяса, со но Яр педучилищее ширтӥз. Удмуртилэн уйпал ёросаз мынон сюрес вылын олокӧня транспортэн курадӟыса ветлэмезлы, отысь праздникъёсы гинэ гуртаз бертылэмезлы со али но пайме. Но дышетскон аръёсыз но отысь шедьтэм эшъёсыз ноку уз вунэ.
Дышетон удысын ужан сюресэз Марина Хаматнуровналэн Сарапул городын кутскиз. Отын арлэсь кема гинэ ужаса вуттэм, гуртысьтызы ик Анатолий нимо пиен семья кылдытӥллям. Егитъёс вордскем гуртазы улыны кутскиллям. Свердловск улосвылысь Реж городэ интыяськыкузы пизылы арес вал ни. Марина нылпи садын воспитатель луыса тыршиз. Школае сюрес ӧз лёгиськы ни. Пичи нылпиосыз визьнодан ужаз ик пенсие потытозяз тыршиз. Марина Хаматнуровналы ужен но, кузпалэн но удалтэм. Анатолий трос уг вераськы, нош быдэстэм ужез – вераса быдтонтэм. Со – зарни киё воргорон, ваньзэ валась но быгатӥсь. Анатолий Галямович Уйпалан улытозяз автобусэн но ворттылӥз, нефтяникъёслэсь нимысьтыз машинаоссэс но нуллӥз.
Вордскем гуртазы бертыса, Апкаримовъёс Мариналэн анаез доры, Тауфа апай доры, улыны интыяськизы. Со огназ улэ ни вал уго. Вить ар куспын кузпалъёс корказэс тупатъязы, корка сиг интые гужем улон корка каризы, верандаязы кухня лэсьтӥзы. Кык висъето корка пӧрмиз, канализация, ванная – ваньмыз вань. «Мылкыдыд, коньдонэд ке вань, киыд ке мынэ, гуртын но городын кадь улыны луэ», - шуо соос. Азбаразы но соослэн асьсэлэн лэсьтэм беседказы, чебересь клумбаоссы сыло. Марина сяськаос будэтыны яратэ. Ижевскын но Челябинскын улӥсь внукъёссэс нылпи площадказы возьма. Али Ижевскын улӥсь Таня нылзы семьяеныз ӵемгес бертыны быгатэ. Марсель пизы кыдёкынгес ик.
Егит пенсионеръёс ужаны уг ветло ни ке но, соос гуртын улӥсь калык понна тыршо. Анатолий алигес выль сабантуй лэсьтон кыразы ӵошатскон площадкаос тупатъяз, сцена лэсьтӥз. Марина гуртысь женсоветэн кивалтэ. Субботник кароно-а, кыӵе ке ужрад-а ортчытоно, гурт кузя коньдон-а бичано - Марина Хаматнуровна гурт поселениын ужасьёслэн нырысетӥ юрттӥсьсы.
Анна БАЙДУЛЛИНА.
Калтасы ёрос.
Туспуктэм вылын: Апкаримов кузпалъёс Тауфа апаен но нылзылэн семьяеныз.