Ми котьку песятайлэн улэп бертонэзлы оским

Толон клубе концерт учкыны потай. Дас аресъем ныл кылбур лыдӟиз. Солэн одӥгез чурез али ке но пель сьӧрам шуккиське: «…Не бывает без дедушки детства…»

Мынам но пичи дыры песятайтэк ӧй ортчысал, дыр. Но вань сыӵе кыл - ож. Со ик монэ песятайтэк кельтэм. Ми тодӥськом вал, песятаймылэн нимыз Шайхи вылэм шуыса. Со ож кутскемлэсь азьло армие кошкем. Война кутскем бере нырысетӥ нуналъёсаз ик солэн чиптэм-чаптэм ышем-быремез сярысь ивор вуэм. Татышлы ёросысь Вязовка школалэн борддорысьтыз «Никто не забыт, ничто не забыто» стендаз милям песятайлэн но тусбуйыз вал. Со туспуктэм туж вуж вал ини, соин ымнырыз но туж уг адӟиськы вал. Школа коридорын нокин ӧвӧл дыръя туж тыршыса учкылӥ дуно но тодмотэм тусбуй шоры.

Дорын песятай сярысь трос ӧз вераське. Мар бен вералозы, милям атаймы Шайми Шайхлисламович Шайхлисламов атайзэ чик уг тоды ни бере. Атаез армие кошкыку солы одӥг арес гинэ вылэм. Атай туж вераськись ӧй вал, атаез сярысь вераськыку солэн мылкыдыз туж ӝож луылӥз. «Атай» кылэз но со туж кепыраса кадь но лякытэн вералляз. Со дышемын ӧй вал та дуно кылъёсты шара вераны. «Атай мынам туж чебер гожъяське но, суредаське но вылэм, - тодам лыктэ атаелэн верамез. - Школаын дышетскыкум корка сигысь тетрадьёссэ шедьтыса, солэн гожъяськытэк кылем висъёсаз гожъяськисько вал, туж чебересь суредъёсыз, тась-тась чылкытэсь чертёжъёсыз вал». Соку атай туж жаля вал, со тетрадьёсыз ке но синпельлы ӧз кельты шуыса. Милям но туж адӟеммы потэ вал со тетрадьёсты… Нош мар чертёжъёс вал меда со тетрадь листъёсын соку, 1938-1939-тӥ аръёсы?

Ми школаын дышетскыку, 80-тӥ аръёсы, котькин тодэ вал, Быдӟым Атыкай ожлэсь азьло Юг шурлэн ӵыпетаз электростанция ӝутэмын вал шуыса. Вязовка гуртын ӝытъёсы коркаосыз электротыл югдытӥз. Али электричествоен нокинэ уд паймыты, паймиськомы соку, куке тыл кысэ. Но 1938-тӥ аре нокин уг оскы вал электротыллы. Вязовкаын но уг малпало, уг оско вал таӵе воштӥськонъёслы. «Номыр но уз пӧрмы тӥляд»,- шуэ вылэм песяймы но кузпалэзлы. «Луоз, ваньмыз но луыса потоз», - мур осконэн пумитаз вазьылӥз песятай Шайхи Хаспутдинович Хаспутдинов (апайлэн тодэ ваёнысьтыз). Школаын линейкаосын но вераллязы электростанциез ӝутэмзы, калыклэн тыршыса ужамез сярысь. Но милям песятаймылэсь нимзэ малы ке ӧз поттылэ.

Ми котьку оским, песятай кытын ке но улэп, дыр, куке но бертоз ми доры шуыса. Луо ук сыӵе паймымон зэмос учыръёс. Анаймы вӧтаз сое котьку улэпен, велосипед вылын, вӧзаз пичи пиен ӵош адӟылӥз. Таӵе вӧт солы огпол гинэ ӧз вуылы. Эн малпалэ, ми со паймымон учырез возьмамысь дугдӥм шуыса…

Кузпалы война вакытысь историен тунсыкъяське, сое эскере. Со пӧртэм сайтъёсысь война вакытэ ог-дасо чиптэм-чаптэм ышемъёс сярысь иворъёс шедьтӥз. Шайхи сярысь иворен но пумиськиз ни.

Со сяна, со Татышлы ёросысь «Азьлань» газетлэсь 1938-1939-тӥ аръёсы потэм номеръёссэ шедьтӥз. Отын гожтэмын: «…Комсомолец Ахметов С. но Хаспутдинов Ш. эшъёс монтёр луыса ужало. Соос асьсэ вылазы уж басьтӥзы, «ХХ ар юбилее Юг вуысь электростанцилэсь внешней но внутренней проводзэ лэсьтыса быдтомы» - шуизы. Нош соос та ужез быдэстыса, колхоз уж борды кутскизы». («Азьлань», 1938-тӥ ар, 5-тӥ сентябрь»). «16-тӥ мартын, Юг шурысь электростанциямы Башсельэлектроысь но районысь лыктэм эшъёс комиссия лэсьтыса принимать каризы. Электростанциез 23-тӥ февральын ходэ лэземен лыдъязы, эксплуатацилы сётыны тырмыт, ярамон шуизы.

Соин валче, электростанциын умой ужась эшъёсыз, бадӟым гинэ премияосын премировать каремын… Комсомолец-монтёр Хаспутдинов Ш. эшез одӥг ыжен…» («Азьлань», 1939-тӥ ар, 12-тӥ апрель). Озьыен, туэ Вязовкаысь электростанцилэн ужаны кутскемез дырысен 80 ар тырмемын. Песятаймы Шайхи Хаспутдинович Хаспутдинов зэмзэ ик ужаз туж кулэ объектын – электростанци ӝутонын - электромонтёр луыса. 1939-тӥ арын сое армие басьтӥзы, собере война кутскиз...

Али мон валасько ини, малы соку, мон школаын дышетскыку, тодазы ӧз вайылэ ни песятайлэсь нимзэ, угось со сярысь гожтэмын вал «…пропал без вести…» Та чуръёс туж кышкытэсь вал… Та чуръёсын ышылӥзы адямиослэн улэп мугоръёссы, адямиослэн чебер нимъёссы, адямиослэн дано ӟеч ужъёссы. Озьы ик таӵеослэн семьяоссы государстволэсь юрттэт но ӧз басьтэ.

Али, туала вакытэ, тодэ ваёмы ваньзэс, кинлэн улонэз куспетӥ луиз войнаен сэрен. Ожмаськонэн йырин нылпиос атайтэк но, анайтэк но, песятайёссэс тодытэк но будӥзы. Ож бусыын атай-анай луонэз тодымтэ егитъёс, нылпиос трос быризы. Соин но ӵужайёс, песяйёс кырӟазы таӵе кырӟанъёс «Мар война та, мар война та, вань калыкез бӧрдытэ».

Алёна Шаретдинова (Шайхлисламова).