Быдэс улонзэс гуртлы сӥзизы

Валентин Надыршович вордскемын Яндовка гуртын. Песятаезлэн вордскем гуртаз, Байшадые, соос семьяеныз 1953-тӥ арын кӧчиллям. Валентинлы соку вить арес сяна вылымтэ. Байшады школаын 6 класс дышетскыса, со Алтау школае вамыштэм. «Куасэн, велосипедэн, пыдын ветлоно луиз. Интернатын улӥм. Тодам на, постель одӥг манетэн басьтӥськом вал. Гуртлэсь сыӵе зол мӧзмиськом вал, соин, вылды, бертыку сюрес но туж матын потылӥз. Берен Алтауэ мыныку ик сьӧрамы басьтэм няньмес яке сухаримес сиёмы вал», - тодаз вае Валентин агай. Шор ёзо тодон-валан со берлогес ас гуртаз ик, ӝытъёсы, учебно-консультативной пунктын басьтӥз ни. Германиын службазэ ортчытэм егит пи армия бере аслыз кузпал кыдёкысь утчаса ӧз ветлы, гуртысьтызы Азьминурен ӵош кариськем. Гуртын улонэз но ужанэз капчи уд шуы. «Ужамтэ уж ӧз кыльы. Бригадир но вал, техникая юрттӥсь но», - шуэ арлыдо воргорон. 2002-тӥ арын ужаны выжиз фермер хозяйствое. Отын пенсие потытозяз тыршиз, инженер-механик вал.

Азьминур апай вань улонзэ пудо утён бордын тыршиз. Асьсэ гуртазы гинэ ӧвӧл, бигер Ардашево, ӟуч Александровка гуртъёсы но ужаны ветлӥз. Берло бригадаын пӧртэм ужъёсты быдэсъясь вал. Пенсие потӥз санитарка ужысь. Ыж утьыса, скал кыскыса секыт ужамез, кынмыса ветлэмез али туж шӧдыто пыдъёсаз. «Егит дыръя астэ уд утиськы, уд валаськы сое», - шуэ со. Али кузпалъёс Айрат пиенызы уло. Быгатэмзыя пудо вордо: скал, ыж утё. Ужаны дышем адямиос ужтэк улыны уг чидало. Бакчаязы но трос картофка, кушман, кабачки будэто. Кузпалъёслэн бадӟым Марат пизы семьяеныз Свердловск улосвылысь Дружинино городын улэ, араз огпол-кык пол мӧйы анай-атаез доры бертаны тырше. Гуртын улӥсьёслы юрттӥськоно, юртъер котырын пиосмурт кужым кулэ карись ужъёс быронтэм.

Анна БАЙДУЛЛИНА.

Бурай ёрос.