"Ужано отын, кытын кельше"

Янаул городысь Анжела Дорина но ассэ пӧртэм удысъёсын эскериз. «Мынам кык вылӥ тодон-валанэ. Асме мон вузкарисьын, культура удысын, банкын но мукет ужъёсын эскери, - вера Анжела Валерьевна. – Кӧня ке ужам бере валай, лулпушкын маке но уг тырмы кадь шуыса. Собере мон «Жемчужина» салонэ ужаны интыяськи. Парикмахерын тырши. Та удысын дышетскеме ӧй вал ке но, каллен ваньмызлы дыши. Бровистлы, визажистлы, шугарингъя мастерлы тодон-валан люкай». Та удыс ик Анжела Валерьевналэн сюлэмаз сюрес шедьтӥз. Нош бӧрысь аслыз чеберлыкъя салон усьтон сярысь малпанэз кылдӥз. Кылем арысь коньывуон толэзе малпанэз быдэсмиз.

- Анаелэн дурбасьтэмез, «тынад ваньмыз луоз» шуэмез мыным оскон пыӵатӥзы. Со сяна, анаен атае, Андрей агае кылын сяна, коньдонэн но юрттӥзы, - вера Анжела. Пусйыны кулэ, егит ужбергатӥсьлэн агаез но ас понназ ужа. Со пыдкутчанъёс тупатъя, гын сапегъёс лёге.

Туннэ нуналэ чеберлыкъя «Лайм» салонын дас ужасьёс лыдъясько. Соос пӧлысь ньылез парикмахер, куинез гижыосты тупато, кыкез синлысъёсты будэто, одӥгез шугаринген выре. Анжела Дорина двоюродной сузэръёссэ но ужен тырмытон сярысь сюлмаськиз. Туннэ Надежда Тимершина но Ирина Хаматнурова бордаз ужало.

Салонэ нуналаз кызьлы матэ адями вуэ. «Кулэ ке, уже вазь ӵукна но потӥськом, бер ӝытозь но ужаськом, - вера Анжела. – Одӥг интыямы ум сылӥське. Быгатонлыкъёсмес паськытатӥськом, тодон-валанъёсмес будэтӥськом. Тон тросгес тодӥськод ке, дорад адями оскыса вуэ. Коллективамы ог-огмес валаса ужаськом, праздникъёсты но ӵошен ортчытъяны тыршиськом».

- Таиз ужды пумысен мар верасалды? – юай Анжела Валерьевналэсь?

- Кельше. Та удысын котьмае тодэм потэ. Соин ужано отын, кытын кельше. Со сяна, мон эркынэз яратӥсько.

Анжела Валерьевналэн мышкыз но кужмо. Сое дораз яратоно кузпалыз но кык нылпиосыз витё. Соос гажано адямизы понна котьку дурбасьтозы, солы юрттозы но валалозы.

Марина НИКОЛАЕВА.

Янаул ёрос.

Туспуктэм вылын: А. Дорина (паллянысен кыкетӥез) но И. Хаматнурова.