Нырысетӥ удмурт школа

Карлыганысь удмурт шор школае тодон-валан люканы Вятка, Казань, Уфа, Пермь, Саратов губерниосысь удмурт пиналъёс ветлыны кутско. Палэнысь лыктэмъёс интернатын уло. Та школаез йылпумъямъёс тросэз дышетӥсьёс луизы. Выпускникъёс пӧлысь тужгес но даноосыз: Акилина Векшина (нырысетӥ удмурт нылкышно кылбурчи Ашальчи Оки), солэн агаез Иван Векшин (Айво Иви, кылбурчи), Максим Прокопьев (дышетӥсь, кылбурчи, удмуртъёслы автономи кылдытӥсьёс пӧлысь одӥгез азьветлӥсь), Иван Михеев (удмурт нылпиослы нырысетӥ учебникъёс дасясь), Иван Ильин (кылбурчи), Яков Ильин (гожъяськись, тодосчи) но мукетъёсыз.

Карлыган удмуртъёс доры кемалась ветлэммы потэ вал ни. Алигес ми, «Кизили» журналлэн редакцияз ужасьёс, кузь сюрес вылэ потӥм. Озьы тупаз: со нуналэ куазь дугдылытэк сямен зориз. Татарстанысь Кукмор карез ортчеммы бере навигатормес ужатыны кутским, сюресэз ум тодӥське угось. Балтась ёросысь Ӟаны (Средний Кушкет) гурт доры вуэммы бере навигатормы паллянэ кожыны косӥз. Асфальт вылтӥ кӧня ке мынӥмы но, нюко-гопо сюрес кутскиз. Валатскимы: татӥ ветлӥсьёс ӧвӧл, озьы ке но азьпала мынонмес ӧм уретэ. Ярам ай, татӥ зол зорымтэ на. Ог дас куинь иськем ортчыса, ми Карлыганэ вуим. Отын улӥсьёс вуж сюрестӥ лыктыны быгатэммылы паймизы. Нош ми асьмеды тазьы буйгатӥм: вашкала вакытэ пӧртэм сэрегъёсысь Карлыган школае ветлӥсь удмурт пиналъёслэсь сюрессэс милемлы одно ик адӟыны кулэ вал. Со вакытэ машинаос ӧй вал на. Пыдын но валэн ветлӥзы, вылды. Тодон-валан басьтыны мылкыдзы туж бадӟым вылэм! Солы али но паймоно.

Карлыганысь «Ӟардон» калык ансамбль – Марий Элын улӥсь удмуртъёслэн ымнырзы. Сотэк та элькунын одӥг бадӟым ужрад но уг ортчы. Дано ансамбль милемыз школаысен кырӟаса-эктыса пумитаз. Та коллектив Башкортостанын но трос пол вал ни, «Чакара» фестивале но пыриськытэк уг кыльы. Та ансамблен кема аръёс ӵоже кивалтэ Марий Элысь культура удысысь дано ужась Мария Аркадьевна Главатских.

Карлыган черкогурт милемлы ёрос центр выллем потӥз. Татын трос квартираен кык этажо юртъёс но вань. Тротуаръёс асфальтэн шобыртэмын. Урамъёссы чылкыт, вож-вож ожо будэ.

Карлыганын Октябрь революцилэсь азьвыл ик вӧй шукконзы, парен ужась но тӧл вукооссы ужаллям.

1923-тӥ арын Карлыганын 28 коркаос вылӥллям, 202 улӥсьёсыз луиллям, ваньмыз ик удмуртъёс. Али та черкогуртын удмуртъёсын ӵош поръёс но, ӟучъёс но, бигеръёс но уло. Тупаса, ог-огзэс валаса тыршо. Гуртазы нылпиослы спортшкола но усьтэмын, Мари-Турек крезьгур школалэн филиалэз но ужа. Калык инструментъёсъя оркестрзылэсь шудэмзы ми учкимы но кылзӥмы. Синмаськымон!

Ватыны кулэ ӧвӧл созэ: мукет интыосын сямен ик, Карлыган палась удмурт пиналъёс но ӟучомо. Анай кылзэс арняяз одӥг урок гинэ дышето. Озьы ке но тапалан удмурт сямъёсты уг вунэто на. Асьсэлэн дӥськутсы но возиське.

1891-тӥ, 1894-тӥ аръёсы татчы тодмо финн тодосчи Юрьё Вихманн ветлэм. Тодосчи кузпалызлы тазьы гожтэм: «Сямъёссыя Карлыганысь удмуртъёс финнъёслы кельшо. Трос вераськыны уг ярато, тыршисесь, Инмарлы оскись. Ӝӧк вылазы котьку нянь но пурт кыллё. Семьяысьтызы котькудӥз, озьы ик куно мурт но, котькыӵе вакытэ нянез шорыса сиыны быгатэ».

Карлыганъёслэн куноосты капчи мылкыдын пумитан, сюдон-сектан сямзы али но умой утиське. Соос доры вуыса, астэ кемалась тодмоосыд, ӵыжы-выжыосыд пӧлы сюремен шӧдыны кутскиськод.

Ульфат

Бадретдинов.

Марий Элысь Мари-Турек ёрос.

Туспуктэмез авторлэн.