Ӵошен улэм аръёссы - узырлыксы

Туктафия апай Бадӟым Качак гуртын вордӥськемын. Татысь тямыс классэз йылпумъямез бере одӥг ар фермаын ужаз. Нош 18 арессэ тырмем бере со Узбекистанэ ужаны мынӥз. «Дӥськут ӧз луы. Мон 1966-тӥ арын октябрь толэзе ке мынӥ, Толя декабре вуиз. Отысен ми ог-огенымы пумиськимы, - вера Туктафия апай. – Чугун сюрес вылын тыршимы. Кызьы ужаськеммы, сыӵе пӧсь вал отын». «Узбекистанын удмуртъёс но, бигеръёс но трос ужазы», - та вакытысь улон аръёссэ тодаз вайыса вера Тынбахтиноын вордӥськыса будэм Толя агай. Татысен ик соос тодматскиллям но кузпалъяськиллям. Адель пизы вордӥськем.

Мурт шаер кузпалъёслэн сюлэмзылы матын луымтэ. Озьы тямыс ар улэмзы-ужамзы бере соос Вылысь Тыхтеме интыяськиллям. Гуртын егит кузпалъёслы гурт хозяйство корка висъям. Толя агай толалтэ фермаын кочегарын тыршем, нош гужемзэ - АВМ-ын операторын. «Мон ужысь дугдӥ но, АВМ но быриз, - тодаз вайыса, вера Толя агай. – Ми ужаку колхоз кужмо луиз. Кык бадӟым фермаез вань вал, куинетӥзэ но ӝутӥзы. Дас скал кыскисьёс ужазы». Туктафия апай но фермаын пӧртэм ужъёсты быдэсъям. Скотникын но, учётчицаын но, весовщицаын но тыршем.

Нош али гурт удысэ трос кужымзэс понэм кузпалъёс пенсиын ни. Ӵошен югыт, чылкыт утялтэм юртазы уло. Ыжъёс, курегъёс, парсь утё-вордо. Бакча мертто. «Пу, турын дунэн басьтӥськом. Улон гинэ айбат мед луоз, пенсиез но соку сётозы», - вера Туктафия апай.

Кузпалъёслэн нылпиоссылэн – Адельлэн но Анжелалэн – асьсэлэн семьяоссы вань ни. Соос анай-атайзылы вить нунокъёс кузьмазы. Толя агаен Туктафия апай доры внукъёссы котьку шумпотыса вуо.

Марина НИКОЛАЕВА.

Калтасы ёрос.