Доре сюрес ке вань, со - шуд

Бурай ёросысь Байшады гуртысь Камильянов кузпалъёс та дыре кыкназы гинэ уло. Нуналлы быдэ соослэсь сюлэмзэс нылъёссылэн но нунокъёссылэн, правнучкаоссылэн борддоръёсазы лякылэм но шкафъёсазы интыям туспуктэмъёссы шунто. Ма, асьсэос но нылпиоссы вордскем юртазы бертылытэк уг чидало.

Павел Ахунович но Лира Тимеровна кыкназы ик Байшадыын вордскемын. Соослэн тодазы на пичи дырзы, школаын дышетскем аръёссы. Соку Байшадые Мамады, Касиярово гуртъёсысь но дышетскыны ветло вылэм. Алтау гуртэ 8 классъем школа ӝутэмзы бере та гуртъёсысь но Байшадыысь пиналъёс выль школаын дышетскыны кутскиллям. Байшадыос соку тросэз вал вордо вылэм. Трос дыръя анай-атайёс нылпиоссэс школае валэн нуллӥллям. Интернатын улӥсь дышетскисьёс арня пумын ваньзы ӵош пыдын гуртазы бертылӥллям.

Тямыс классъем тодон-валан басьтыса, Павел агай Вуж Балтаче механизаторъёсты дасян курсъёсы мынэм. Собере Мичурин нимо колхозын тракторен, комбайнэн ужаны кутскем. Гурт удыс сое бордаз кыскем. Закарпатьеын службазэ ортчыса, со вордскем палъёсаз дыртэм. Татышлы ёросысь Арибаш гуртэ интыяськем ЛТШ-ын водительлы дышетскыса, гурт хозяйствоязы шофёр луыса ужам. Котьма ужзэ рос-прос лэсьтӥсь, тыршись но быгатӥсь воргоронэз берло складэн кивалтӥсе пуктӥллям. Та удысын со 27 ар ужам. Нош огъя ужам стажез 40 арлы ӵоша. Пенсие потэмезлэсь азьвыл вить арзэ Павел Ахунович гуртысьтызы фермер хозяйствоын тыршем.

Лира Тимеровнаез улон нуныямтэ. Тямыс класс бере ик ужез веръяно, секытлыкез чидано луэм. Со фермаын скал кыскем, ыж утем, пӧртэм ужъёсты быдэсъям. Дышетскон сярысь малпанэз луымтэ, Лиралы 17 арес дыръяз анайзы кулэм, куать нылпиос анайтэк кылиллям. Бадӟым семьяын будэм ныл огназ гуртэ улыны кылем, мукетъёсыз городъёсы улыны интыяськиллям. Сочиысь, Североуральскысь, Николаевысь ӵыжы-выжыоссы куное ӵем бертыло.

Камильяновъёслэн куинь нылъёссы. Соос анай-атай юртсылэсь кыдёке кошкиллямтэ. Бадӟымез Лариса нылзы Уфаын улэ. Со ачиз ӵужанай но песянай ини. Марита но Марина нылъёссы семьяосынызы Бурай ёросын ик уло. «Бадӟымез пичиосызлэсь ӵемгес бертылэ, - шуэ Лира Тимеровна. – Ми ваньзэс чидатэк возьмаськом. Алигес гинэ вал утемысь дугдӥмы. Нылъёсты автобусэ поттыны кулэ шуыса, вал вордӥмы». Али соослэн гаражазы «УАЗ» машиназы сылэ. Зоро-кото вакыт солэсь но умой машина ӧвӧл, пе.

Анна БАЙДУЛЛИНА.