Вань иворъёс
Общество
23 куартолэзе 2019, 13:59

Сюлмыз кыске "Пинал сюлэме"

Пермь шаерысь Куеда ёросысь Гожан гуртысь «Пинал сюлэм» ансамбле ветлӥсьёс пӧлысь одӥгез мӧйы кырӟась - Лидия Милляхматовна Марданова.

Арлыдыз шоры учкытэк, сое сюлмыз дышем сюрестӥз клуб пала, яратоно эшъёсыз доры кыске. Кырӟан мылкыдыз Лида апаез «Пинал сюлэме» ансамбль кылдон аре ик вуттэм. Со 1999-тӥ ар вылэм. «Али но ансамбле ветлӥсько ай. «Пинал сюлэмлэсь» 20 арзэ ортчытӥм ке, дугдо шуисько вал. Чидало-а, уг-а? Каль но быре ини. Аръёс асьсэлэсь каро», - шуэ Лида апай.
Выль кен луыса Гожанэ Лида апай Вуж Шагирт гуртысь лыктэм. «Ӟуч школаын дышетски. Тямыс классэз ӧй быдты, «Горд Кизили» колхозэ бригадае ужаны потӥ. Аткаен анкай пенсие потытозязы муш утизы, соослы юрттӥськи», - тодаз вае со ас гуртаз улэмзэ. Кызь арессэ тырмыса, егит ныл Герман нимо пиен улонзэ герӟам. Выль кен нырысь школаын техничка луыса ужам, собере колхозын пӧртэм ужъёсты быдэсъям. Кузпалыз 7 классэ умой ке но йылпумъям, (одӥг гинэ ньылез вылэм, мукетъёсыз - витьёс), механизаторлы сяна, мукет ӧнерлы дышетскыны луонлыкез вылымтэ. Кузпалъёс уж сюрессэс колхозын ортчытӥллям.
Витьтон кык ар ӵоже Марданов кузпалъёс шумпотонъёссэс но, куректонъёссэс но шори люкизы, ньыль нылпи, кык ныл но кык пи, будэтӥзы. Нылпиоссы адӟем карымон будӥзы. Соос пӧртэм удысъёсын асьсэлэсь интыоссэс шедьтӥзы. Бадӟымез пизы Евгений Германович «СП имени Мичурина» ООО-лэн директорез. Али Лидия Милляхматовна соин но солэн Нина кузпалыныз улэ. Кенэз но анайзы сярысь ӟеч кылъёсын гинэ вазиське: «Туэ ӵош улэммылы 40 ар луэ ни. Дорысь вань ужез кенешыса ӵош быдэсъяськом. Анкаймы гидэ но, бакчае но милесьтым азьло бызьыса потэ ай. Кин мае лэсьтыса вуттэ, ноку но ог-огмылэсь возьмаса улэммы ӧвӧл. Гужем курегпиос, ӵӧжпиос, ӟазегпиос сьӧрын бызьылэ. Пичияк муш но утиськом. Анкаймы тэк пуконэз уг тоды».
Юртъер котырын бергамез, «Пинал сюлэм» ансамбльысь эшъёсыныз пумиськыны ветлэмез сяна, Лидия Милляхматовналэн эшшо одӥг тунсыкъяськонэз вань на. Со киужен вырыны яратэ. Лыдъяд ке, 80 аресозяз кӧня ӵушкон пужъятӥз, нырос-пӧзьыос керттӥз меда? Берло дыре пӧртэм узоръёсын носкиоссэ чеберманы яратӥсько, пе. Яратоно ансамблезлэн юбилеяз но солэн керттэм пледэз но мукет чебер киужъёсыз адскымон интыын валемын вал.
Дас нунокъёслэн но дас вить правнукъёслэн ӵужайзылы-песяйзылы азьпалан но таӵе задорлык но тазалыко улон сӥзем потэ.
Анна БАЙДУЛЛИНА.
Пермь шаерысь Куеда ёрос.