Шудзэ шедьтӥз удмурт гуртысь

Сизьым классэ йылпумъяса, егит ныл колхозэ ужаны потэм. Ӵапак соку вербовщикъёс лыктӥллям, Туймазые стройкае ужасьёсты нуыны. Колхозысьтызы соку дас кык кузя егитъёс мынӥллям. Соос пӧлын Зайтуна но луэм. Озьы со гуртэныз люкиськем. Нырысь Туймазыын ужам, собере Стерлитамакысь кирпич заводын кирпич вандылэм. Ӟеч ужамез понна басьтэм Данъян грамотазэ Зайтуна Нурисламовна али но уте. Стерлитамакын ик вуоно кузпалыныз тодматскем. Байшады пи Султангали отчы агрономлы дышетскыны мынэм вылэм. Егитъёс куспын яратон тылгизьы кенжем. Нырысь соос куспазы бигер кылын вераськиллям. Байшадые вуыса, вылькен вань сюлмыныз удмуртъёслэсь улон эсэпсэс аслыз карыны тыршем, ӝоггес кылзэс дышетыны, культураенызы тодматскыны турттэм. 1957-тӥ арысен удмуртъёс пӧлын улыса, али Зайтуна апай удмурт кылын умой вераське.

Зайтуна Нурисламовна Байшады гуртэныз данъяськон мылкыдын уж сюрессэ тодаз вае: «Шулдыр улӥм но ужам. Ужан аръёсы колхозын ортчизы: куро люкам, алма, кушман октӥм. Султангалие агрономын ужаз, фермаен кивалтӥз, берло заправщик вал. Колхозамы ньыль бригада вал, 115 кузя турын октыны поталлямы. Одӥг ужлэсь но ӧй кыльы». Али мӧйы кышномуртэ гуртазы улӥсьёслэн, нылпи куараослэн кулэсмемзы туж сюлмаськытэ.

Зайтуна но Султангали Султангараевъёс ньыль пи но одӥг ныл будэтӥллям. Нылпиоссы анай-атай бурд улысь кемалась потэмын ни. Али Зайтуна апай Рафик пиеныз но Галина кенэныз улэ. Кузпалыз Султангали дас куинь ар талэсь азьло улонэн люкиськем, вирзӥбетэн (давлениен) курадӟе вылэм. Зайтуна апайлы нылпи кайгу но адӟоно луэм. Зарезьын ужан удысэз быръем Ильдар пиез пӧламы ӧвӧл ни.

Улонэзлы ӝожтӥськытэк, вань умойзэ гинэ тодаз вайыса, Зайтуна Нурисламовна каллен юрт котыразы берга, быгатэмезъя нылпиосызлы юрттӥське. «Кызь ар пала ини вордскем палъёсы бертылэме. Татын улӥ, гумыр кари, дыши. Удмуртъёс ас калыке кадь пото ни», - шуэ удмурт кылын вераськись бигер апай.

Анна БАЙДУЛЛИНА.

Бурай ёрос.