Нылпиослы ӟеч улон кузьман понна, тыршыса ужано

Нокыӵе кун программаосын пайдаяськытэк, Тимерхановъёс выль юрт ӝутыса потӥллям. Та уж капчиен сётскымтэ ке но, соос тыршыса ужаллям. Али эркын но шулдыр юртазы шумпотыса уло. Ӝутӥськон ужлы коньдон поттыны юрттэм гид тросазы вордэм пудозы. Скал выжыысь пудо вордон сяна, кузпалъёс вал, парсь вордо. Сюлмо воргоронлэн ужез но пудоосын герӟаськемын: кызьы школазэ йылпумъяса пудо вордон борды кутскем, али но та удысын тырше.

- Армилэсь азьло свинокомплексын грузчик вал, бертыса, XХII партсъезд нимо СПК-ын скотник луыса ужасько. Новонадырово гуртысь куинетӥ номеро МТФ-е нуналлы быдэ аслам валэным ветлӥсько, - ужез сярысь вера Ильнар Тимерханов. - XХII партсъезд нимо СПК укмыс гуртэз огазея.

Кузё воргоронлэн азбараз корт «валэз» но вань. Таиныз Ильнар гуртоосызлы, мукет гуртъёсысь вазиськисьёслы бакчазэс гыре, турын турна, ворттэ, мукет чыры-пыры ужъёс лэсьтэ, семья бюджетаз коньдон пыртэ.

Ӟеч кузпал, нылпиоссэ яратӥсь атай луон сяна, Ильнар Илюсович гуртэзлэн культурной улоназ мыло-кыдо пыриське. Со бигер кырӟанъёсты туж усто кырӟа, арлы быдэ сабантуйын валэн ӵошатске.

Регина картэзлэн котькуд ужезлы дурбасьтэ, юрттӥське. Со - ташкичиослэн почтальонказы. Али Ильназ пиеныз декретной отпускын пуке. Егит кышномуртлы дорысь ужъёссэ лэсьтыны юрттӥсько ни Базитамак шор ёзо школаын 4-тӥ но 2-тӥ классъёсын дышетскись Азалия но Альбина нылъёсыз. Соос кыкназы но пичи дырысенызы художественной самодеятельностен тунсыкъясько: кырӟало-верало, экто. Школалэсь ваньмыкузы арес но укмыс толэзьем Ильназ экеенызы шудыны ярато. Вераськыны яратӥсь нылъёс Данъян грамотаоссэс но возьматъязы на. Пичи классъёсын дышетскисьёслэн соос трос люкаськемын ни.

Та семьяын кык калыкъёслэн кылзы но культуразы кузёяське. Регина нылъёсыз атайзылэсь кылзэ - удмурт кылэз - валаса-тодыса мед будозы шуыса тырше. Ачиз но кузпалызлэсь кылзэ вала. Нош бигер кылын та удмурт гуртын пичи дырысенызы вераськыса будо.

Семьялэн шудбурез нылпиос бордын, шуо. Но соослы ӟеч улон кузьман понна, тыршыса ужано. Гуртын но ӟеч улыны луэ, ужлы мыло-кыдо, котьмалы кыл кутӥсь луид ке.

Анна БАЙДУЛЛИНА.