Егитъёс - гуртлэн осконэз

- Быгатонлыкъёсты кинлэсь выжемын? - юатэк ӧй чида Алексейлэсь.

- Анай-атайзы выжые мынэмын, луоз, - вера Алексейлэн Ольга кузпалыз. – Анаймы гуртамы староста вылэм. Со туж шаплы луэм. Нош аткаймы кадь эктӥсь гуртын вылымтэ.

Алексей - Можга пи, нош кузпалзэ Шудекысь шедьтэм. Ӵошен соос 13 ар тупаса но ог-огзэс валаса уло. Семья кылдытэмзы бере егит кузпалъёслы гурт хозяйствозы Конигово гуртэ пичи корка басьтыса сётэм. Со вакытэ Алексей «Победа» хозяйствоын трактористын тыршем. «11-тӥ классэз йылпумъям бере ик колхозын ужаны кутски. Атай тракторист вал. Солэсь адӟем карыса ветлӥ. Нош юрттӥськыку шумпотонлэн пумыз ик ӧй вал», - вера Алексей. Нош али пичи корка интые тып-тып юн юрт ӝужамын. «Социальное развитие села» кун программаен пайдаяськыса, 2009-тӥ арын соос выль юртэ улыны выжизы.

Берлось укмыс арзэ Алексей Янаулысь электросетьын тырше. Нош Ольга кузпалыз кыкетӥ арзэ Шудекысь школаын покчи классъёслы тодон-валан сётэ. Ӵошен соос пи но ныл будэто. Кирилл пизы туэ куатетӥ классэз йылпумъялоз ни. Солэн но спектакльёсысь рольёсты шудонын талантэз вань, пе. Кирилл ньыльёслы но витьёслы гинэ дышетске, баскетболэн шудыны но куасэн бызьылыны яратэ. Надежда нылзы вить аресысеныз художественной гимнастикаен выре, пӧртэм акробатической движениос лэсьтылэ.

Минигуловъёс ужаны но, шутэтскыны но, ужрадъёсы пыриськыны но дыр шедьто. «Семьяен кинотеатръёсы ветлӥськом, толалтэ куасэн гурезе нискыланы тубаськом. Гужем кыре палаткаосын шутэтскыны потаськом», - вера Ольга Замировна. Озьы соос азьланезлы кужым но задор мылкыд люкало.

Марина НИКОЛАЕВА.

Янаул ёрос.