Ӵуказе нуналлы оскыса улоно

Пенсие потытозь кема ай, маке но ужано, семьяез сюдоно. Амало пиосмурт кема малпаськыса ӧз улы, аслыз трактор басьтӥз. Табере сое тулысысен лымы усьытозь дорысьтыз шедьтыны шуг: гуртоосызлэсь, бускель гуртъёсын улӥсьёслэсь бакчаоссэс гыроно, турын турнано, жуг-жаг кисьтоно но мукет. Кӧня ке шутэтскон толэзьёс тупаку но Виталий ужтэк пукыны уг тоды. Вакчиесь тол нуналъёсы тракторзэ тупатъян сяна, мукет чыры-пыры ужъёс но сюро. «Уробоез - толалтэ, дӧдьыез гужем дасяло» визькылэз со пичи дырысеныз тодаз возе угось. Тракторезлы кулэ луись ватсэтъёс но Виталий ачиз лэсьтэм. Тракторен ужано ке, герыез, мажесэз, мукетыз но кулэ. Виталийлэн данъяськонэз – ас киыныз йӧндырем лымы вылтӥ ветлӥсь техникаез. Куинь ар ке но выриз бордаз, туэ соин бусыостӥ ширтылӥз ни. Ксюша нылзылэн инвалидной креслоез ӵемысь тӥяськылэмысь, сое но ас сяменыз, мукет кортъёс ватсаса, тупатэм. Кухняязы гарнитур но ас киосыныз лэсьтэм.

Зилина Гильмиевна, Виталийлэн кузпалыз, дышетскемезъя – покчи классъёсты дышетӥсь. Та ӧнеръя тодон-валан со Благовещенск педучилищеын но заочно Бирскысь пединститутын дышетскыса басьтэм. Алтау, Ваныш-Алпаутово школаосын ужам. Огъя стажез 14 ар лыдъяське. Берло переквалификация ортчыса, «дорын дышетон» амалъя 3-4 дышетскисьёс доры ветлыса ужаны кутскем. Трос дыръя бускель гуртъёсысь дышетоно нылпиосыз доры пыдын, куасэн, лымы но нӧд коласа, сюрессэ фонарикен югдытыса вуылэм. «Секыт вал озьы ветлыны», - шуэ дышетӥсь. Кузпалыныз кенешыса, ужысьтыз кошконо кариськем. Куинетӥ арзэ ни биржаын лыдъяське. Табере со трос дырзэ нылзылы висъя.

Зилина Гильмиевна Ксения нылзэ киужен вырыны дышетэм. Вуриськон машина но басьтӥллям. Ӵошен вуриськемзы, пӧртэм аппликациоссы, куролэсь лэсьтӥськемъёссы ёрос конкурсъёсын вылӥ интыосын дунъямын. Али Ксюшаез компьютер, интернет бордазы юн кыско, пе. «Азьло куасэн но, ошмесэ вулы но ветлӥськом вал, - вера анаез. – Али педло потыны мылкыдыз туж шер луэ, компьютерын шудон - вань тунсыкъяськонъёсыз пӧлысь тужгес яратоноез».

Та семьяын чидатэк витё Нефтекамск городын улӥсь бадӟым нылзылэсь, апайзылэсь Наташалэсь семьяеныз куное бертэмзэ. Зилинаен Виталий – ӵужанаен ӵужатай ни. Соослэн куинь аресъем внучказы будэ.

Гуртын улонэз капчи ӧвӧл. Тыршоно, шедьтоно, быгатоно, лэсьтоно. Мухаметхановъёс та ласянь мукетъёслы адӟем карымон луо. Та мыло-кыдо семьялы - тазалык но чидан, ӵуказе нуналлы оскон.

Анна БАЙДУЛЛИНА.