«Ошмес» паськыт мед ӧръяськоз

Каллен гинэ ураметӥ ортчисько. Бадӟымъёс, мӧйыос удмурт кылын ӟечбуръясько, верасько. Нош пиналъёс ваньзы ӟуч сямен вазё.Со дыре малпан кылдэ, кыӵе умой, пичиысен ӟуч кылэз тодыса будо шуыса. Но со анай кылэз тодонлы медаз люкеты вал. Нылпиос медаз вунэтысалзы вордскем удмурт кылзэс.

Киям – Андрей Гильмаевлэн «Пумиськонъёс но люкиськонъёс» повестез. Та книгаез мыным «Ошмес» газетын ужасьёс кузьмазы. Туж бадӟым тау соослы. Автор повестяз удмуртъёслэсь улэм-вылэмзэс, сямзэс, йылолъёссэс, тыршыса ужамзэс возьматыны тырше. Озьы ик шумпотыса киям кутӥсько арнялы быдэ вуись «Ошмес» газетэз. Мур малпаськоно ке, та анай кылын потӥсь газетмы удмурт калыкез юн герӟа, мукет ёросъёсын но палэнын улӥсь удмуртъёсын тодматэ. Газетэз лыдӟыса, соослэн улэм-вылэмзы, азинсконъёссы, вормонъёссы сярысь тодӥськом. Асьмелэн газетмы котькуд удмурт семьяе вуысал ке, туж умой луысал. Малы ке шуоно сое кылдытон понна трос кужым понэмын.

«Ошмеслэн» нырысетӥ редакторез Андрей Гильмаев вал. Туннэ нуналэ солэсь ужзэ тыршись, улон шоры валаса учкись, удмурт кылэз гажась, калык культураез утён сярысь сюлмаськись адямиос азьланьто. «Ошмес» газетмы паськыт мед ӧръяськоз. Солэн лыдӟисьёсыз ноку медаз быре.

Мария

АЛЕКСАНДРОВА.

Янаул ёросысь Шудек гурт.