Дышетон удысэз быръем апай-сузэръёс

УдГУ-ысь филологияя факультетлэсь удмурт ёззэ йылпумъяса, Инна Рашидовна вордскем гуртаз бертэ но школаын ужаны кутске. Солы соку ик удмурт, ӟуч кылъя но литературая урокъёсты оско. Школаысь ужзэ вис карыса, Марина, Линар, Тимур нылпиосыз вордскизы. «Ужме, школаез, пиналъёсыз туж яратӥсько. Нуналлы быдэ - школа, дор, хозяйство. Шӧдытэк ик кыли 27 арлэсь ортчемзэ», - вера дышетӥсь.

- Кыӵе предметэн дышетыны тужгес кельше? - юасько Инна Рашидовналэсь.

- Котькуд предметлэн вань аспӧртэмлыкез. Удмуртэн дышетыны кельше вал, малы ке шуоно пиналъёс ӧжыт вал. Урок ӵоже котькудӥзлы саклык висъяны луэ. Али та предметэн уг ке но дышетӥськы ни, тодӥсько, туала нылпиос ӟуч кылэз умойгес тодо, анай кылзэс кунгожсьӧр кылэз кадь дышето, - сюлэмшугеныз люкиське дышетӥсь.

Нылпиос будо но анай-атай юртысь «лобӟо». Тросэз пиосмуртъёс но палэнын ужало. Ӵем дыръя Инна Рашидовна 6-тӥ классын дышетскись Тимур пиеныз кыкназы кылё. Инналэн кузпалыз Роберт Григорьевич Пермь улосвылэ вахтаен ужаны ветлэ. Сыӵе дыръя пудо утён быдэсак кышноез вылэ усе. Солы Тимурез юрттӥське. Ахметовъёслэн бадӟым нылзы Марина Казаньын дышетскыса, отчы ик улыны кылиз, банкын ужа. Линар пизы, Ижысь сельхозакадемиын куать ар дышетскыса, армиын службазэ ортче.

Инна Рашидовналэн Ирина сузэрез покчи классъёсты дышетыны Башгоспединститутын дышетскиз. Солэн уж сюресэз 1993-тӥ арын Янаулысь одӥгаз школаысен кутскиз. Вакчи дыр куспын пичи классъёслы завуч луиз но… улонзэ чутрак воштӥз. Соку со быземын ни вал. Роберт кузпалыныз гуртазы корка ӝутӥзы но город улонзэс гуртлы воштӥзы. «Карьерист ӧвӧл мон. Тодӥсько, кивалтӥсь луыса ужаны быгатысал. Татчы бертэм бере но школае директоре ӵекто вал, пумит луи, - шуэ Ирина Рашидовна. – Семьяеным инкуазь доры кариськеммы, городын огыр-бугыр улонлэсь пегӟеммы потӥз». Кашаповъёс Максимын 14-тӥ арзэ уло ни. Нырысь Ирина Рашидовна школаысь интернатын воспитатель луыса ужаз, завучлэсь ужзэ быдэсъяз, пионервожатой но вал, историен, обществознаниен урокъёс нуиз. 2018-2019-тӥ дышетскон арын ас вылаз англи но немец кылъёсты басьтыны дӥсьтӥз. Кыӵе гинэ уж борды уг басьтӥськы, солэн ваньмыз пӧрме уго. Выль предметъёсты дышетон понна переквалификация ортчиз. Ужаз туала технологиосты кутыны тырше.

Ирина Рашидовналэн кузпалыз бигер. Максим гуртын таӵеезлы паймонэз ӧвӧл, суро семьяос трос пумисько. Кашапов кузпалъёслэн кык нылпиоссы. «Школамы шор ёзо ӧвӧл ни. Нылпиос но ваньзы сямен 9-тӥ класс бере кошкыны дырто. Аслам но озьы каризы», - шуэ Ижевскысь торгово-экономической техникумын 3-тӥ курсын но Нефтекамскын машиностроительной колледжын 1-тӥ курсын дышетскись пиослэн Алмазлэн но Янлэн анайзы.

Инна Рашидовналэн нылыз Марина школаын дышетскыку апай-сузэръёс асьсэ выжы писпузэс лэсьтӥзы. Марина со ужен олокӧня ёрос конкурсъёсы пыриськылӥз. Эскерыны кутскыса, куать поколенизэс шедьтӥллям. Али ӵыжы-выжыоссы пасьталае гинэ вӧлмо на. Ужзэс уг аналто, выль вордскемъёссэ ватсаса мыно.

Огазьын будэм, одӥг интыын ужась апаен сузэръёс – матысь эшъёс. Ужзыя ужпумъёссэс но кенешыса быдэстыны тыршо, праздникъёссэс но огазьын ортчыто. Янаулын улӥсь анайзы доры ӵем вуыло. Соос котьку ӵошен.

Анна БАЙДУЛЛИНА.