Ужась муртэ уж ачиз шедьтэ

Маргарита гурт хозяйствоын парсь, кунян утем, скал кыскем, Роман нефтяникъёслэн радазы ветлэм, строительной бригадаен кивалтэм. Кузпалъяськем беразы сизьым арскын Зиятовъёс выль корка ӝутон борды басьтӥськиллям. Герман пизы, Диана нылзы вордӥськиллям. Чайковский городын художник-оформительлы дышетскем Романлэн вань тодон-валанзэ семьяез понна ӝутэм корказ пыӵатэмез потэм. Та дыре Зиятовъёслэн кык этажо юртсы ӝутэмын ни, кыкетӥ этажаз уг уло на. «Роман – мастер, мон - дизайнер», - корка ӝутэмзы пумысен юанэлы серекъяса вера кузё кышно. Ма, пиосмурт вӧзын кышномурт уг сылы ке, кортӵог но кырыж кошке шуыса юнме вераллямтэ, дыр.

Зиятовъёслэн мансардаё, пуэз вандылыса-чеберъяса обшивать карем корказы вырйылын сылэ, кыдёкысен ортчисьёслэсь синъёссэс бордаз кыске. Пушказ пырид ке, паймод – ваньмыз валаса но каньыл тупатэмын. Кылсярысь, шкаф-купе кадь усьяськись висъет ӧсъёс, киын лэсьтэм мебель. Корка пушкын кибашлы Роман Сидоровичлэн ужъёсыз сяна, Маргарита Минлиаскаровналэн но ужез адскымон. Со вужмем, кулэтэм арбериослэсь чебер макеос пӧрмытъя. Кылсярысь, солэн киосыныз бадӟымесь вазаос лэсьтэмын. Соос – огшоры пияла бутылкаос вылӥллям. Маргарита ноку ужлы ёрмыса уг улы. Пудо но сюдоно, 85 аресъем анайзэс, Бибия апаез, но утялтоно. Кузпалыз но пиез палэнын ужало угось.

Романлэн лэсьтӥськыны мастерскоез вань. Татын ӧсъёс, ӝӧкъёс, укно янакъёс, рамкаос лэсьтӥсько. Роман гур но поттыны быгатэ. Вазись луиз ке, одно ик мынэ. Куд-ог дыръя гуртооссы ик корка пушсэс чеберманы, тупатъяны ӧтё. Ужась муртэ уж ачиз шедьтэ.

Анна БАЙДУЛЛИНА.

Татышлы ёрос.