-18 °С
Салкым
Антитеррор
Вань иворъёс
Общество
4 апрель 2019, 14:17

«Котькудӥз выль нунал – со шуд но шумпотон»

Озьы малпа Байшадыын улӥсь гажано Адия Минниахметова

Адия Меншараповналэн быдэс улонэз Байшады гуртэн герӟаськемын: со татын вордскем, татын будэм, татчы ик бызем, татын ик ужам, али но со яратоно гуртаз улэ. Тулыспал толэзе Адия апайлы 84 арес тырмиз. «Мон огнам уг улӥськы, нылъёсы черодэн дорам бертыло. Соос монэ городэ нуыны но дась, мон уг мынӥськы. Мон гуртын улыны дышемын. Гуртын шокан омыр ик мукет», - вера куать нылъёслэн анайзы.
Адия Меншараповналэн пичи дырыз война аръёсы тупам. Солэсь тодэ ваёнъёссэ кылзыку, синкылиос ик быльырско. «Мон пичи вал ай, озьы ке но тодам кылем, атай советско-финской жугиськонэ кошкиз. Анайлы огназлы туж секыт луиз. Бускель Сарсаз гуртын улӥсь ӵужатае ӵем дорамы ветлэ вал. Атай войнаысь бертытозь, со дорын улӥм. Анай вазь ӵукна ужаны кошке но бер ӝыттэк уг берты вал. Уен-нуналэн бусыын ужазы. Толалтэ но кутсаськизы», - вера Адия апай. Арлыдо кышномуртлы анай-атай шунытлыкез веръяса будыны кылдымтэ. Атаез одӥг ожысь бертэм но мукетыз ожмаськон кутскем. «Быдӟым Атыкай ож кутскем бере ик, нырысетӥ нуналаз, атаез войнае басьтӥзы. Со шофёр вал. Соин туж ӝог басьтӥзы, луоз. Нош ик ӵужатай ас дораз улыны нуиз. Секыт будӥ, ваньзэ веръяно луи. Сютэмлыкез но адӟи, секыт уж но монэ палэнтӥ ӧз ортчы. Шумпотымон, атай жугиськонысь улэп бертӥз», - маде Адия Меншараповна. Но ож лудын адӟем секытлыкъёсыз атаезлэн тазалыказ юн шӧдӥськиллям. 1952-тӥ арын Адия апай атайтэк кылем. «Атай ӵем висьылӥз. Озьы ке но ужаз. Колхозын кизиз-араз, собере йӧл нуллӥсе пуктӥзы. Берло со бензовозын ужаз», - тодаз вае А. Минниахметова.
Адия апай сизьым классэ Байшадыын йылпумъяса, колхозэ ужаны потэм. «Ноку уг вунэты из поттыны ветлэмез. Шунды ӝужа гинэ ай, нош ми Василя эшеным бусыетӥ вамышъяськом ни, ужаны мынӥськом. Утяган гуртлэн урамаз из вӧлдӥзы. Со изэз гурезьысь асьмеос поттаськом, валэн нуллӥськом, вӧлдӥськом. Туж секыт уж вал со. Нырысь улонтӥмы но ӧй вал. Шалаше интыязы. Куазь дугдытэк зоре, ми шалашын кынмыса улӥськом. Берло квартирае пыртӥзы», - вера Адия Меншараповна.
Пичи дырзы война аръёсы тупам адямиослы туж трос секытлыкъёсты адӟоно луэм. Озьы но соос «чигиськиллямтэ», ваньзэ вормыса потыны тыршиллям. Быдэ вуыса, семья кылдытӥллям. Нылпиоссылы шудо улон кузьман сярысь сюлмаськыса улӥллям.
Адия апайлэн улонэз Байшадыысь ик Гильниахметэн герӟаськем. Кузпалъёс куать нылъёслы улон кузьмаллям. «Милям дышетскыны луонлыкмы ӧз луы. Нылъёсмы мед дышетскозы шуыса тыршим. Олямы Бирскысь пединститутэз йылпумъяз. Юлямы медучилищеын дышетскиз, Зилиямы – Хабаровскысь инженерно-строительной институтын, Танямы – УдГУ-ын. Надежда медицинаез бырйиз, военной эмчи луиз. Света Ижевскысь сельхозинститутын тодон-валан басьтӥз. Туннэ нуналэ соос понна шумпотыса улӥсько, данъяськисько. Соослэн ӟеч иворъёссы – мон понна бадӟым кузьым», - вера арлыдо анай.
- Туала улон пумысен мар верасалды? Ма Тӥледыз сюлмаськытэ? - юасько Адия Меншараповналэсь.
- Котькудӥз выль нунал – со шуд но шумпотон. Туннэ куноын кадь улӥськом. Ӝӧквыл тыр – сиён-юон. Проблема – со юон. Уж ӧвӧл шуыса, гуртысь воргоронъёс юон борды кырмисько. Кӧня егитъёс со курыт макеен сэрен улонысь кошко! Тыршись адями ужзэ но шедьтэ, пудо вордыса но улэ. Пиналъёс но егитъёс со курыт вуэн медаз эшъяськысалзы. Юон вӧлмытӥсьёс но мед малпаськысалзы, азьпалан мар луоз шуыса.
Миляуша БУЛАТОВА.
Бурай ёрос.