-21 °С
Салкым
Антитеррор
Вань иворъёс
Общество
28 южтолэзь 2019, 14:23

Семьяязы ог-огзэс гажан кузёяське

Улонын котькуд адямилы дуно но матын луэ аслаз семьяез. Нош семьяез юнматӥсь, улонэз азьланьтӥсь – со кышномурт. Улонэз юн яратӥсь, улон шоры валаса учкись, калыкез гажась нылкышнолэн семья пушказ но шудо улон кузёяське.

Гожтэме потэ Янаул ёросысь Конигово гуртын улӥсь Веля Садиевна Сайфутдинова сярысь. Гурт калык сое Меннур нимын тодэ. Быдӟым Атыкай ож кутскыку, Веля Садиевналы одӥг арес вылэм. Ож кыл ик вера, луоз, кыӵе секытлыкъёсты со улоназ адӟоно луэм.
Веля Садиевна Калтасы ёросысь Туганеево гуртын вордскыса будэм. Пичи дырысеныз ик бадӟымъёсын ӵош бусы ужъёсты быдэсъям. Уж но улон туж зол кыдатӥллям солэсь егит мугорзэ. Аръёс ортчыса, Веля Садиевна улонзэ Кониговоысь Илья Сайфутдиновичен герӟам. Со колхозын тракторист луыса ужаз. Семьязы мукетъёслы адӟем карымон луиз, тыршыса улӥзы. Кузпалъёс вить нылпи вордӥзы. Шумпотонзылэн пумыз ӧй вал, Ирик пизы мединститутэз йылпумъяса , пинь эмъясь луыса ужаны кутскем бере. Сизьым ар гинэ ужаны вутскиз, малпамтэ шорысь пизы улонэн люкиськиз. Со бере кема дыр ӧз ортчы, Илья Сайфутдинович улонысь кошкиз. Кыӵе секытлыкъёсты вормоно луиз кышномуртлы. Нылпиосыз анайзылы юрттӥзы, котьку вӧзаз луыны тыршизы, ужез яратӥсь луыса будӥзы.
Туннэ нуналэ Веля Садиевна Павел пиеныз но Таисия кенэныз улэ. Соос кызь тямыс ар ини ӵошен, туж тупаса уло. Павел Янаулысь УТТ-ын ужа, Таисия Владимировна – Шудек гурт поселенилэн администрацияз управделами. Таисия но Павел кык нылпи будэтӥзы. Юлия нылзы Ижевскын улэ, медсестра луыса ужа. Костя пизы Бирскын дышетӥсьлы дышетскиз, али армиын служить каре.
Пересьмон нуналъёсаз Веля Садиевна яратоно нылпиосыз пӧлын. Туннэ нуналэ солэн вить внукъёсыз но одӥг правнукез. Нылпиосыз дораз ӵем вуылыны тыршо. Арлыдо кышномурт соослэн котькуд быдэстэм ужзылы шумпотыса улэ. Таисия Владимировна анкайзы сярысь туж данъяськыса вера. Озьы ик улоно, дыр, та югыт дунне вылын. Корка пушкын ог-огдэ валан, шыпытлык ке кузёясько, ӵуказе нуналлы оскон кылдэ, улон шулдыр ортче.
Мария
АЛЕКСАНДРОВА.
Янаул ёросысь Шудек гурт.
Читайте нас в