Нунал вордӥське, улон азьланьтӥське

Мамады нылаш Касияровое бызем апаез доры куное вуылыкуз, вуоно картэныз тодматскем. Радис кузпалыныз 49 ар ӵош улэмзэс со ӟеч кылъёсын гинэ тодаз вае: «Адямиосын капчиен огкыл шедьтылӥз, огпол урод кыл ӧз вера. Трактористысен кутскыса, учётчик луиз, фермаен кивалтӥз, бригадирлэсь ужзэ но быдэсъяз. Пенсие потыса но дорын пукыны ӧз чида: вузэ пыртэ, пузэ вае, вукозэ изэ вал…» Алигес улонысь кошкем Радис Шаймухаметович сярысь кузпалыз синкылитэк вераны уг быгаты.

Вылькен луыса лыктэм Зинаида Николаевнаез ужан сюресэз кема аръёс ӵоже школае нуллэм. Удмурт кылъя но литературая дышетӥсь 20 ар нылпиослы анай кылзылы яратон пыӵатэм. Берло со медпунктын санитарка, фермаын учётчица луыса тыршем.

Садыковъёс куинь нылпи будэтӥллям. Бадӟымез пизы Вячеслав – военной лётчик. Уфаысь вертолётной училищеез йылпумъяса, со Чита городын ужа. Кыдёкын улӥсь пиеныз, кенэныз но соослэн ньыль пиосынызы Зинаида апай араз огпол сяна уг адӟиськы. Вячеславлэн ужез военной гарнизонын гинэ ортче ке, анайлэн сюлмыз шуг ӧвӧл. Секыт но кышкыт профессия быръем пиезлэн пӧртэм учениосы, командировкаосы, кышкыт интыосы лобанъёсыз пумтэм. Уженыз со Сирие но вуылэм. «Инмар мед утёз пиме. Куддыръя отчы-татчы ветлэмъёссэ тодытэк но кылисько», - шуэ сюлмаськись анай.

Али Зинаида апай Айрат пиезлэн семьяеныз улэ. Айрат Радисович – физкультурая дышетӥсь. Солы трудъя, англи кылъя, черчения урокъёсты но оско. Кызь вить ар стажен дышетӥсь гуртысьтызы школазы ворсаськытозь Касияровоын ужам, али Выль Тазлар шор ёзо школаын дышетэ. Ужез БР-ысь Спортъя но егитъёслэн ужъёссыя министерстволэн тау карон гожтэтэныз дунъямын. Линара кузпалыз Касияровоысь ик. Медсестралы уж луымтэен, со гуртазы почта нуллэ. Соослэн Алёна но Света нылъёссылы анай-атайзы, песяйзы доры ӵем бертылыны уг кылды, соос кыкназы но – студенткаос, Уфаысь вузъёсын дышетско. Пизы Ренат али гижысь-пиньысь дышетске, солэн но апайёсызлэсь бере кылемез уг поты, вылӥ тодон-валан басьто шуэ.

Зинаида апайлэн Лариса нылыз но дышетӥсь. Бирскысь социально-педагогической академиын дышетскыса, семьяеныз Нефтекамск городын улэ, одӥгаз школаын ӟуч кылъя но литературая тодон-валан сётэ.

Та дуннеын кин ке вордӥське, кин ке кошке. Садыковъёслэн кык этажо корказы алигес кайгу пыриз ке но, улон азьланьтӥське. Кылемъёслы сабырлыкен, выль кужымен, тазалыкен, шудэн-бурен улыны мед гожтоз.

Анна БАЙДУЛЛИНА.