Клуб гуртооссэ котьку вите

Татын али 38 улоно юрт лыдъяське. «Гуртын 78 адями улэ. Тросэз – арлыдоос, пенси аресэ матэктӥсьёс», - вера татын улӥсь арлыдо пиосмурт Валентин Гарейшин. Егитъёс гуртазы ӧжыт ке но, байшадыос мӧзмыса улыны дышемын ӧвӧл. Гуртысьтызы клубазы тунсыко ужрадъёс ӵем ортчыло. Кылсярысь, Выль ар шулдыръяськонъёс, калык праздникъёс татын арлы быдэ радъясько. Гурт калык шумпотыса вера клубазы тупатъян ужъёс лэсьтэмзы сярысь.

- Ёрос бюджетысь коньдон висъяменызы сэрен, клубамы тупатъян ужъёс лэсьтӥм. Борддоръёсы, вӧлдэтэ древесно-волокнистой плитаос йыгамы. Со сяна, шунтон конвекторъёс пуктӥм, - вера клубен кивалтӥсь Зухра Багаутдинова. – Ужазы Ильхам Имангаязов, Андрей Багаутдинов. Соослы бадӟым тау.

Вераны кулэ, Байшады клубын куараос ноку чалмытскыса уг уло. «Туганэ» фольклор ансамбле пыриськисьёс нуналлы быдэ репетициосы потало. «Ёросын ортчоно ужрадъёсы котькудаз пыриськыны тыршиськом», - вера З. Багаутдинова. Али байшадыос спектакль пуктыны дасясько.

Миляуша БУЛАТОВА.