"Мон - вить полэс шудо анай"

- Кӧня арес ни семьядылы? Кузпалъяськыкуды малпады-а вить нылпиды луоз шуыса?

- Малпа, пе. Кылем арын ӵошен улэммылы кызь ар луиз. Людвиг Бирскысь пединститутсэ йылпумъям бераз ик монэ ваиз (лушказ). Монэ ӵужае будэтӥз. Анае монэ вордыкуз улонэн люкиськем. Верамзыя тодӥсько, нырысь нуныосты возён интыын улӥськем, берло нылпи юртэ интыяллям. Арес но ньыль толэзь луэм бере, мон гуртэ бертӥськем. Ӵужае мон оскымон адями бордын шуыса тодэмез бере гинэ кулӥз ай. Сюанмес ӵужкенакъёс ортчытӥзы. Бызем бере куинь ар дышетсконо луиз на. Бирскысь пединститутын дышетски, физико-математической факультетэз йылпумъяй. Огнам будэмысь, лэся, мон котьку малпасько вал, нылпиосы трос луозы шуыса.

- Кӧня ке нылпиосты сярысь вералэ вал.

- Милям ньыль нылъёсмы но одӥг пимы. Бадӟым нылъёсмылэн дышетскон сяна, трос мукет ужъёссы. Соос ӵемысь доре ӝыт гинэ берто. Инесса туэ шор ёзо школаез йылпумъя ни. Кематэк ЕГЭ пыр потонмы вань. Со кырӟаны-эктыны, фотографиен вырыны яратэ, «Ложкари» ансамбле ветлӥз, трос пол «Усточикар», «Шундыкар» лагерьёсын шутэтскиз но тодон-валанзэ будэтӥз. «Ӝужась кизилиос» конкурсэ но пыриськемез вань. Сизьыметӥ классын дышетскись Линда нылмы но крезьгур дуннеен тунсыкъяське: «Ложкари», эктонъя «Надежда» но вокальной ансамбльёсын шудэ, эктэ-кырӟа, «Шундыкар» лагерьын шутэтскиз. Отын «Фольклор» ӧръя тодон-валанзэ узырмытӥз. Куинетӥез нылмы Ангелина 5-тӥ классын дышетске. Со но апайёсызлэсь бере уг кыльы. «Лобыкай» ансамбльын эктыса, туэ эшъёсыныз «Дружба» ёрос конкурсын кыкетӥ инты басьтӥзы. «Ложкарие» ветлӥсьёсын егитъёслэн II-тӥ Российско-китайской тол шудонъёссэс усьтонэ пыриськизы. Нылъёсмы - отличницаос. Куать аресъем Ян пимы нылпи садэ ветлэ. Нош кык аресъем Златаен али дорын пукиськом.

- Нылпиостэс кызьы визьноданы тыршиськоды?

- Визьмоесь, кылзӥськисесь мед будозы шуыса тыршиськом. Ог-огзылы юрттӥськись, дурбасьтӥсь мед луозы. Ужез яратыса мед будозы. Котькытын мед улозы, ужатэк ӝӧк вылэ номыр уг вуы. Бадӟым нылъёс коркаез утялтыны ке кутско, кылсярысь, пичиос но одно ик бордазы итӥсько. Злата пыдкутчанзэ поттэ, кутчатыны косэ, юрттӥськисько шуыса, шкафъёсты ӵушылыны кутске. Ваньзылы ӵош ужаны но шулдыр. Дорысь ужзэс ужакузы но ог-огзылы юртто.

- Эркеяськоды-а нылпиостэс? Кудзылы тросгес яратон шедиз?

- Вань семьяосын озьы луэ, дыр. Нырысь бадӟымзэ яратӥм, кыкетӥез вордскиз но сое тросгес вешаны кутским кадь. Али ваньмы пичизэ эркеяськом. Но сое кыкетӥ нылмы, Линда, утиз, шуыны луоз. Йырсизэ пуныны но солы гинэ сётэ, кыкназы ӵош изё.

- Семьяяды кыӵе праздникъёсты пусйиськоды?

- Выль арез, вордскем нуналъёсты. Удмурт праздникъёсты но пусйытэк ум кельтӥське: тулыс, сӥзьыл куриськонъёсты, кисьтонъёсты туганъёсын ӵош ортчытӥськом. Ян Быдӟымналэз чидатэк возьма, тужгес но Тӧдь туш бабайлэсь курегпуз понэмзэ. Пичиез уг вала ай, солэн но аслаз яратоно праздникез луоз, дыр.

- Кыӵе луыны кулэ кышномурт но анай?

- Нылкышнолэн тужгес бадӟым ужез – нылпиосты яратон, утён, соослэсь быгатонлыкъёссэс усьтыны юрттон. Соос ӟеч адями луыса мед будозы шуыса тыршон, коркаедлэсь шунытсэ, аслэсьтыд небыттэ ваньзылы одӥг кадь люкон.

- Трос нылпиё семьяын расписаниен сямен улоно, дыр. Сотэк вань ужез лэсьтыса вуттыны уг луы кадь. Озьы-а?

- Ваньмызлы дышиське. Вань секытлыкъёсты ӵошен ортчыны тыршиськом. Сизьым часын султӥськом но бадӟымъёсыз школае кошкемзылэсь азьло пудоез утьыса пыриськом. Собере гинэ нылпиосыз сайкатӥськом. Школае, садике келясько, пичиез гинэ монэн кыле. Лумбыт пыд йылын, кухняын бергано ке но, шумпотыса ужасько. Кинлы ке ӧвӧл ук со, асламъёслы ик. Пичи нылы нылпи садэ ветлыны кутскиз ке, школае уже берытскыны мылкыды но вань.

- Мар верасалды кышномуртъёслы Нылкышноослэн праздниксы азьын?

- Ваньзылы тазалык, шуд, яратон, чидан сӥзисько. Нылпи вордыны медаз кышкалэ. Котькуд коркан пичиослэн серекъям куараоссы мед кылӥськозы. Трос нылпи – со бадӟым шуд. Мон - вить полэс шудо анай.

- Антонина Юриевна – тӥ кужмо кышномурт, яратӥсь, яратоно анай но кузпал. Семьяды понна быронтэм ужъёсты азьпалан но ошмес син кадь мед пӧзёзы, пыдъёсты но киосты жадёнэз медаз тодэ. Ӵуказе нунал ӟеч иворъёс гинэ мед ваёз шудо семьядылы.

Анна БАЙДУЛЛИНА.

Татышлы ёрос.